Renault şirkəti Software Republique ilə əməkdaşlıqda hazırlanmış yeni konseptual avtomobili Vision 4rescue-ni təqdim edib. Bu tam elektrikli Reanult markalı avtomobil fövqəladə hallar və xilasetmə xidmətləri üçün xüsusi olaraq hazırlanmışdır. Renault 4 E-Tech modelinə əsaslanan Vision 4rescue Fransa yanğınsöndürmə idarəsi ilə əməkdaşlıqda hazırlanıb və birbaşa sahədəki komandaların ehtiyaclarına cavab vermək üçün təchiz edilib.
Avtomobil təcili yardım xidmətləri üçün xüsusi olaraq hazırlanmış xarici görünüşü ilə diqqət çəkir. Boz tonlarda ziddiyyətli zolaq nümunələri və qırmızı-sarı reflektor detalları avtomobilin xilasetmə məqsədləri üçün istifadə edildiyini açıq şəkildə göstərir. Vision 4rescue orijinal Renault 4 E-Tech ilə müqayisədə yerdən 15 mm hündür olmaq üçün nəzərdə tutulub. O, həmçinin ikinci elektrik mühərriki sayəsində dörd təkərli (AWD) ötürmə qabiliyyətinə malikdir. Avtomobilin damı qısa və uzun mənzilli dronları daşıya bilən xüsusi konstruksiyaya malikdir. Bu strukturda həmçinin 5G bağlantısı, inteqrasiya olunmuş Wi-Fi şəbəkəsi və qoşulmuş təcili yardım çantası kimi texnoloji avadanlıqlar da var. Vision 4rescue-nin gövdəsi iki hissədə açılır. Yuxarı hissədə sürüşmə masası və bu sahədə ikili ekranla təchiz edilmiş yüksək güclü kompüter var. Bu sistem sayəsində komandalar tez bir zamanda hadisə yerində mobil komanda mərkəzi qura bilirlər.
Renault açıqlamasında təxminən 20 fərqli texnologiyanın avtomobilə inteqrasiya edildiyini və bu sistemlərin təcili yardım qrupları tərəfindən istifadə edilən fərqli avadanlıqları standartlaşdıraraq daha sürətli və daha uyğun müdaxilə prosesini təmin etdiyini bildirib. Vurğulanıb ki, Vision 4rescue-nin əsas məqsədi real vaxt rejimində təhlil apara bilən və vəziyyətə uyğun olaraq müdaxilə strategiyasını anında formalaşdıra bilən əlaqəli mobil komanda mərkəzi olmaqdır. Ümumiyyətlə, Vision 4rescue texnologiyanın humanitar yardım və xilasetmə missiyaları ilə necə inteqrasiya oluna biləcəyinin təsirli nümunəsi kimi seçilir. Bu avtomobillə Renault təkcə gələcəyin mobilliyinə deyil, həm də gələcəyin böhranının idarə olunmasına töhfə verməyi hədəfləyir
