Bir çox istifadəçi üçün Vertu brendi premium telefon anlayışının başlanğıcı olmuşdur. Lakin Vertu brendini smartfonlar, hətta qatlanan smartfonlarla əlaqələndirmək çox çətin məsələdir. Qeyd etmək lazımdır ki, Vertu brendi artıq bir neçə ildir qatlanan smartfon bazarında limitli sayda modelləri ilə çıxış edir. Bundan bir ay əvvəl Vertu Fold 3 modeli avropada təqdim edilsə də həmin vaxt smartfon ortaya çıxmadığı üçün yaxşı səs gətirməmişdi. Eyni zamanda limitli stokları qısa zaman ərzində tükənmişdi. İndi isə Vertu Fold 3 seriyası Çində debüt edib və smartfonun canlı görüntüləri daxil olmaqla bir çox detalı dəqiqləşib.
Cihaz barədə deyəcək texniki detallar o qədər də çox deyil. Çünki, smartfonun texniki cəhətdən diqqət çəkən çox az üstünlükləri var. Smartfonun ən maraqlı tərəfi ekranının vizual çanta kimi işlədilə bilməsidir. Gəlin, daha detallı izah etməyə çalışaq.
Əgər cihazın daxildəki qatlanan ekranını çölə doğru tərs büksək, ekranın iki üzü də normal olaraq çölə tərəf baxacaq. Fold 3 modelində çölə tərəf dayanan ekranları əl çantası kimi göstərən proqram təminatı yaradıb. Üstdəki şəkildəki kimi, smartfonu xüsusi aksesuar ilə boynunuzdan asdıqda xaricdəki ekran, rənglərin dəyişə bildiyiniz çantaya çevrilir. Təbii ki, bu xüsusiyyət birbaşa qadınlar üçün nəzərdə tutulub. Smartfonun arxasına baxdıqda kamera modulu ilə paralel sağda yerləşən kvadrat bir detal da görə bilərsiniz. Bu element isə smartfon tərs qatlandıqda kamera modulunun ora yerləşməsi üçün nəzərdə tutulub. Ən mənfi cəhəti isə ekranın içə doğru qatlanmamasıdır. İçə doğru qatlanmadığı üçün mühafizə etmək çətindir.
Vertu Fold 3 modelinin texniki xüsusiyyətləri
Fold 3 modeli öz gücünü Snapdragon 765G çipsetindən alır. 2022-ci ildə çıxan birz cihaz üçün köhnə çipset olsa da performans axtaranların seçimi olmadığından normal qarşılamaq olar. Lakin Android 10 əməliyyat sistemi ilə qutudan çıxması biraz anlaşılmazdır. Şirkətin nəyə görə daha yeni əməliyyat sistemlərindən istifadə etmədiyi naməlumdur. Yeniləmə ilə daha yüksək Android versiyasına keçid edilib edilməyəcəyi də bilinmir.
7,2 düymlük AMOLED ekranın təsvir ölçüsü 1620×1520 piksel təşkil edir. Əgər smartfonu normal cihaz kimi işlətmək istəsəniz yenə də tərs qatlayaraq işlətməyiniz mümkündür. Lakin üstdə də qeyd etdiyimiz kimi içə doğru qatlanmır. Eyni zamanda qatlama mexanizmi 1.8 milyon qatlanmaya qədər dayanıqlıdır.
Gördüyünüz kimi, ekran üzərində selfi kamerası mövcud deyil. Bunun səbəbi isə, arxa kameranın üstə doğru çevrilə bilməsidir. ASUS Zenfon 8 Flip kimi, arxa kamera modulu üstə doğru fırlandığı üçün selfi kamerası rolunu da oynayacaq. Bu kameralardan biri 48MP əsas, digəri isə 16MP ultra-geniş bucaqlı kameradır.
Smartfon 3500 mAs batareya ilə təchiz edilmiş olub, timsah dərisindən hazırlanmış arxa qapağı ilə 7 rəngdə təklif edilir. Smartfonun qiyməti isə 13 684 manat təşkil edir.
