Canalys, iyul-sentyabr ayında olan qlobal smartfon tədarükü üçün ilkin dəyərləri açıqlayıb. Keçən illə müqayisədə 9% azalma olduğu bildirilib. İstifadəçilərin istehlak xərclərini azaltması və iqtisadi qeyri-müəyyənliklərin artması smartfon bazarının 2014-cü ilin 3-cü rübündən bəri ən pis nəticəni göstərməsinə səbəb olub. İddia olunur ki, bu vəziyyət növbəti altı-doqquz ay ərzində smartfon tədarükü bazarına təsir etməkdə davam edəcək.
Samsung, ehtiyatda yığılan telefonları bazara çıxarma strategiyası sayəsində 22% bazar payı ilə liderliyini qoruyub saxlaya bilib. Apple, 18% bazar payı ilə ikinci yeri tutaraq, müsbət illik artım müşahidə edilən beş təchizatçıdan biri olmağı bacarıb. Əlavə olaraq Xiaomi 14% ilə üçüncü, 10% ilə Oppo və 9% ilə Vivo markaları isə müvafiq olaraq 4 və 5-ci yerlərdə dayanıb.
Canalys analitiki Amber Liu qeyd edib ki, “Smartfon bazarı istehlakçı tələbinə yüksək reaksiya verir və satıcılar çətin iş şəraitinə tez uyğunlaşırlar”. Ümumən isə keçən il ilə müqayisədə smartfon tədarükündə elə də ciddi fərq yoxdur. Dünyaca məşhur smartfon şirkətlərinin dünya üzrə smartfon tədarüklərinin keçən ilki nəticələrlə müqayisəsini sizlərə təqdim edirik.
| Şirkət | 2022-ci ilin III rübündə bazar payı | 2021-ci ilin III rübündə bazar payı |
| Samsung | 22% | 21% |
| Apple | 18% | 15% |
| Xiaomi | 14% | 14% |
| Oppo | 10% | 11% |
| Vivo | 9% | 11% |
| Digərləri | 27% | 28% |
Onu da qeyd etmək lazımdır ki, Canalys analitikləri 2022-ci ilin 4-cü rübündə və 2023-cü ilin birinci yarısında smartfonların bazar paylarının cüzi yaxşılaşacağını proqnozlaşdırır.
