Ötən axşam Google şirkəti özünün yeni məhsullarını təqdim etdi. Google Pixel 7 seriyası, Pixel Watch ağıllı saatı, Pixel Buds Pro qulaqlığı və Pixel Tablet nümayiş etdirildi. Pixel Buds Pro qulaqlığının Amerikada 200$ qiymət etiketi, Avropa və digər bazarlarda isə daha yüksək qiymətdən təklif olunması qiymət qarşılığında gözlənilən keyfiyyəti o qədər də doğrultmadı. Bəziləri keyfiyyətdən razı qaldığını bildirsə də ilkin testlərdə səsin orta səviyyədə olması, hər qulaq quruluşu üçün eyni olmaması və sürüşməsi kimi qeydlər edildi. Ona görə qiyməti nəzərən satış ədədləri də aşağı olacaq qulaqlıq barədə çox danışmağa fikrimizcə ehtiyac yoxdur. Pixel Tablet isə Android 13 əsaslı sadə bir planşet olacaq. Ən maraqlı xüsusiyyəti Tensor G2 çipseti ilə təchiz edilməsidir ki, satışa 2023-cü ildən çıxacağı deyildiyindən planşet də tədbirdən sonra çox diqqət çəkmədi. Ona görə başlayaq elə Google Pixel 7 seriyasından danışmağa və Pixel Watch ağıllı saatına nəzər yetirək.
İlk növbədə Pixel 7 seriyasının dizaynındakı dəyişiklikdən danışsaq, tək fərq kamera modulundakı dəyişiklikdə yaranır. Pixel 6 seriyasında arxa tərəfdəki kamera modulu çıxıntısın üzəri şüşəyə bənzər materialla örtülmüşdü. Pixel 7 seriyasında isə kənarlardakı metal dizayn elementi birbaşa kamera moduluna doğru uzanır və şüşə material ləğv edilir. Ona görə də kamera moduluna çöldən baxdıqda kameraların yeri daha dolğun görünür. Dizayn cəhətdən başqa vacib bir dəyişiklik isə Pixel 7 Pro modelinin düz ekran paneli almasıdır. Şəkillərdə cüzi qıvrım var imiş kimi görünsə də Pixel 6 Pro modelindəki kimi kəskin qıvrım mövcud deyil.
Google Tensor G2 çipsetinin performansı
Google Pixel 7 seriyası modelləri öz gücünü Tensor G2 çipsetindən alır. Tensor G1 ilə müqayisədə 5nm istehsal prosesi 4nm Samsung PLP ilə əvəzlənib. Lakin nüvələrin quruluşunda ciddi bir dəyişiklik olmadığı üçün performansı demək olar sabit qalıb və yalnız enerji sərfiyyatı azalıb. 2 ədəd Cortex-X1 nüvəsi 2.85GHz tezlikdə, 2 ədəd Cortex-A78 nüvəsi 2.35GHz tezlikdə, 4 ədəd Cortex-A55 əsaslı nüvəsi 1.8GHz tezlikdə işləyir. 10 nüvəli ARM Mali-G710 qrafik çipinə (GPU) sahibdir. Google şirkəti Tensor çipsetlərində performansa çox önəm verməyib maşın öyrənməsi, süni intellekt, təhlükəsizlik və enerji sərfiyyatının az olmasına diqqət edir. Nəticədə çipsetin performansı aşağıdakı cədvəldə də gördüyünüz rəqib flaqman çipsetlərdən biraz zəifdir. Tensor G1 ilə müqayisədə 60% daha sürətli maşın öyrənməsinə sahibdir və 20% daha az enerji sərf edir. Həmçinin, UFS 3.1 və LPDDR5 yaddaş texnologiyalarına malikdirlər.
| AnTuTu V9 | Geekbench Single-Core | Geekbench Multi-Core | |
| Google Tensor G2 | 801.116 | 1068 | 3149 |
| Google Tensor G1 | 701.920 | 1053 | 2899 |
| Snapdragon 888 | 832.733 | 1143 | 3503 |
| Snapdragon 8+ Gen 1 | 1.122.406 | 1321 | 4238 |
Google Pixel 7 seriyası kamera xüsusiyyətləri cəhətdən nə gətirir?
Pixel 7 və Pixel 7 Pro modellərinin OIS dəstəkli əsas kamerası 1/1.3 düymlük 50MP ISOCELL GN1 sensoru ilə gücləndirilib. Eyni zamanda hər iki cihaz texniki səviyyədə eyni 12MP IMX381 sensoruna sahib ultra-geniş bucaqlı kamera əldə edib. Lakin Pixel 7 Pro modelində ultra-geniş bucaqlı kamera 125.8° genişliyində obyektivə sahibdir ki, 114° obyektivə sahib Pixel 7 modeli ilə müqayisədə daha geniş şəkillər çəkə bilər. Pixel 7 Pro modelinin ultra-geniş bucaqlı kamerası makro çəkilişlər üçün də işlədilə bilər.
Təqdim edilmiş Pixel 7 Pro modelində əlavə bir 48MP ISOCELL GM1 əsaslı və OIS dəstəkli 5 qat optik yaxınlaşdıra bilən telefoto kamerası mövcuddur. Əsas kamera piksel birləşdirmə metodu ilə itkisiz 2 qat rəqəmsal yaxınlaşdırma edərkən, telefoto kamerası piksel birləşdirmə metodu və Tensor G2 çipsetinin maşın öyrənməsi hesabına 10 qata qədər itkisiz rəqəmsal yaxınlaşdırma həyata keçirir. 10 qatdan sonra rəqəmsal yaxınlaşdırma isə 30 qata qədər yüksəlir, amma bundan sonra görüntü keyfiyyətindən itki yaşanır. iPhone modellərinə yeni gələn “Action Mode” adlı hərəkətli videoda görüntünün sabitlənməsinə bənzər xüsusiyyət də Pixel 7 Pro modelində yenilik kimi mövcuddur. Çəkilmiş görüntüdə bulanıqlığın avtomatik bərpa edilməsi, çəkilmiş şəkillərdə arxa plandakı istənilən obyekt və ya insanın silinməsi, keyfiyyətsiz şəkillərdə keyfiyyətin artırılması və.s Tensor G2 çipseti tərəfindən kamera performansı artırmaq üçün təmin olunmaqdadır.
Google şirkəti, Snapchat və TikTok ilə 10 bit HDR videoların bu cihazlardan yayımlana bilən olmasında razılığa gəlib. Nəticədə bu platformalarda Pixel 7 seriyası ilə paylaşılan videolar daha keyfiyyətli olacaq. Pixel 7 seriyasında şəkillərdəki görüntü keyfiyyətinin ən üst səviyyədə olacağından şübhə etmirik, lakin videolarda tam olaraq iPhone 14 seriyası ilə necə rəqabət edəcəyinə baxmaq lazımdır. Hər iki cihaz həm ön, həm arxa kamera ilə 4K keyfiyyətdə 60FPS videolar çəkə bilər. Selfi kameraları isə 10.8MP ISOCELL 3J1 sensoru ilə təchiz olunub.
Smartfonların ekran paneli ötən nəsillə müqayisədə çox dəyişməyib
Yeni Pixel 7 Pro modeli 6.7 düymlük QHD+ LTPO OLED ekran paneli alıb. 10Hz-120Hz arası adaptiv görüntü yeniləmə tezliyinə malik smartfonun ekran parlaqlığı sələfi ilə müqayisədə 25% artıb. Pixel 7 modeli də 6.3 düymlük FHD+ OLED ekran paneli əldə edib. Ekran panelinin görüntü yeniləmə tezliyi 90Hz təşkil edir ki, Pixel 6 ilə müqayisədə dəyişiklik edilməyib. Hər iki cihazın ekranı Gorilla Glass Victus ilə qorunur. Lakin 24 bit rəng dərinliyi və 16 milyon rəng yaratma qabiliyyətinə malik bu ekran panelləri görüntü keyfiyyəti cəhətdən maksimum təcrübə yaşatmalıdırlar.
Pixel 7 seriyasının digər texniki xüsusiyyətləri və qiyməti
Yeni Pixel 7 Pro modeli 5000 mAs, Pixel 7 isə 4355 mAs həcmli batareya ilə təchiz edilib. Hər iki cihaz 30 Vatt sürətli şarj dəstəkləyir. Ekstremal batareya qənaəti rejimində bu cihazların 72 saatadək istifadə müddəti verdiyi bildirilir. Kabelsiz və tərs şarj xüsusiyyətinə sahibdirlər. Google One proqramı daxilində pulsuz və orijinal VPN xidməti gətirən cihazlar Android 13 ilə qutudan çıxıb 5 ilə qədər yeniləmə dəstəyi alacaqlar. Stereo səs ucaldanlara sahib cihazlara 3 ədəd mikrofon quraşdırılıb. Tamamilə təkrar edilmiş alüminumdan hazırlanmış cihazların başlanğıc qiyməti Pixel 7 üçün 650 avro, Pixel 7 Pro üçün 900 Avro təşkil edir.
Pixel Watch ağıllı saatı nə vəd edir?
Render görüntülərində bir o qədər mükəmməl görünən Pixel Watch, real həyatda təxmin etdiyinizin çox gerisində hissiyata malikdir. Xarici mediada ekranın kənarında sanki “təkər” var deyən istifadəçilər, ekranın qalın çərçivələrindən narazılıq ediblər. Eyni zamanda batareya müddəti də 24 saatdan azdır ki, hər gün şarj etmək məcburiyyətindəsiniz. Bəlkə də bunun səbəbi LTE dəstəyidir və enerji sərfiyyatını xeyli artırır. Lakin normal bir istifadəçi üçün batareyanın bir neçə gün bitmədən getməsi daha əhəmiyyətlidir..
41 mm ölçülü Pixel Watch ağıllı saatı 1.2 düymlük 1000 nit parlaqlığa sahib ekranla təchiz edilib və Gorilla Glass 5 ilə qorunub. Həmişə açıq ekran xüsusiyyətinə sahibdir. Paslanmaz poladdan hazırlanan gövdəsi ilə Pixel Watch ağıllı saatı 5ATM suya dayanıqlıdır. EKG sensoru ilə nəbzin ölçülməsini detallı analiz etməsi, qanda oksigen və şəkər miqdarını hesablaması mümkündür. Ağıllı saatın daxilində 2018-ci ilə qədər Galaxy Watch ağıllı saatlarında işlədilən Exynos 9110 çipi işlədilib. Nəticədə ola bilsin qeyri-effektiv enerji sərfiyyatı bundan qaynaqlanır. Apple Watch modellərindəkinə bənzər qəza aşkarlanması funksiyası mövcuddur, amma növbəti ilə qədər aktiv olmayacaq. WearOS əməliyyat sistemi ilə işləyən Pixel Watch modeli GPS, NFC, Bluetooth texnologiyalarını da özündə birləşdirir.
Əgər LTE dəstəkli variantını almaq istəsəniz 430 avro, yox əgər sadə Wi-Fi dəstəkli variantını almaq istəyirsinizsə 380 avro ödəməlisiniz. Qeyd edək ki, bütün cihazların Amerika qiymətləri biraz daha münasibdir.
