Çinin texnologiya nəhəngi Xiaomi şirkəti bir-birindən maraqlı texnoloji avadanlıqlar çıxarmadan dayana bilmir. Belə ki, son vaxtlar adını çox eşitdiyimiz Xiaomi Mijia brendi bu dəfə də rəqibləri ilə müqayisədə çox baha olmayan qiymətə portativ batareya hazırlayıb. Erqonomik görünüşü, qarşısındakı nəhəng LED ekranı və müxtəlif güclü xüsusiyyətləri özündə birləşdirən Mijia Outdoor Power Supply 1000 Pro modelinə gəlin yaxından nəzər salaq.
Outdoor Power Supply 1000 Pro modelinin 1800 vatt güc çıxışı ilə tozsoran belə işlətməyi yoxlaya bilərsiniz
Xiaomi şirkəti portativ batareyanın daxilində litium (bərk-maye hibrid tipli) tərkibli batareya paketi istifadə edib. Batareya tutumu isə 1022 Wh və ya 280.000 mAs təşkil edir. Qeyd edilənə görə Mijia Outdoor Power Supply modelində termal vəziyyətə nəzarət üçün 21 temperatur sensoru quraşdırılıb və nəticədə 1000 şarj dövrünə qədər davamlılıq əldə edilib.
Cihazın arxa tərəfində 4 ədəd 1800 vatt elektrik yuvası mövcuddur. Beləliklə, bir çox avadanlığı bu portativ batareyaya bağlayaraq normal elektrik mənbəyinə qoşmuş kimi şarj edə və ya işlədə bilərsiniz. Eyni zamanda 13 fərqli cihazın bu enerji qurğusuna taxılması mümkündür. Hətta, Mijia Outdoor Power Supply modelinin ön tərəfində 2 ədəd 100 Vatt sürətli Type-C çıxışı qoyulub. Nəticədə şarj üçün adapterə də ehtiyac qalmır. Sizə sadəcə şarj üçün uyğun Type-C kabeli lazımdır.
Smartfonlarından fərqli olaraq Xiaomi şirkəti bu cihazı IP67 sertifikatı dərəcəsində sudan və tozdan qoruyur. Mijia APP adlı tətbiq ilə avadanlığın enerji sərfiyyatını, söndürülüb-yandırılmasını, qoşulu cihaza enerji verilməsinin dayandırılmasını və.s idarə edə bilərsiniz. Avadanlığın qiyməti isə Çində 865$ (5999 Yuan) təşkil edir. Rəqibləri təqribi 1000-1400$ səviyyələrində qiymət etiketinə sahib olduğundan Xiaomi şirkəti bu sahədə də üstünlüyü ələ alacaq.
