Smartfon istehsalçıları arasında qatlanan ekranlı smartfonların satışı və bazar həcmi ilə lider olan Samsung deyəsən, yeni bir mərhələyə hazırlaşır. Qatlanan ekranların yüksək reytinqindən ilhamlanan istehsalçı adi smartfonların da ekranlarını “genişləndirə” bilər. Belə ki, şirkət bu ilin yanvar ayında Ümümdünya Əqli Mülkiyyət Təşkilatına (WIPO) müraciət ünvanlayıb. Patentin detalları isə 25 avqustda ictimaiyyətə yayımlanıb. Alınmış yeni patent ilə birlikdə Samsung şirkəti cihazın arxasına ekran yerləşdirə biləcək.
Ekran qapalı olduğu təqdirdə, arxa qapaqdan fərqlənməyəcək!
Samsung mühəndislərinin patentləşdirmiş olduğu yeni texnologiyanın hansısa modellə birlikdə seriya istehsalına gönədirilib-göndərilməyəcəyi məlum deyil. Lakin Samsung şirkətinin smartfon arxasına yerləşdirməyi planlaşdırdığı ekran paneli üçün aldığı patent bəzi detalları ortaya qoyur.
İstehsalçı patentə əsasən, bu texnologiyanın 3 fərqli metodunu sınaqdan keçirir. Birinci metod ekranın kamera modulunun yanında yerləşməsindən ibarətdir. Bənzər metodu Xiaomi 11 Ultra modelində görmüşdük. İkinci metod isə Galaxy Z Flip 4 boyda bir ekranın “Samsung” yazısı olan hissədə aşağı yerləşdirilməsidir. Belə olduğu halda dizayn cəhətdən həm erqonomik olmayacağından, həm də pis görünəcəyindən istifadəsi məntiqsizdir.
Üçüncü metod isə smartfon arxasında 60 faizlik bir hissəni ekranın tamamilə qapatmasıdır. Ən sağdakı görüntüdə yerləşən üçüncü metod ən ideal variantdır ki, sönülü vəziyyətdə qapaqdan heç cür fərqlənmir. Eyni zamanda arxa ekrandan istifadə üçün də geniş bir sahəyə malikdir. Təəssüf ki, bu metod da qiymətə xeyli mənfi təsir edəcəyindən effektiv olmaya bilər.
Ehtimallara görə Samsung şirkətinin bu ekran texnologiyaları üçün aldığı patent orta seqment Galaxy A seriyasında istifadə ediləcək. Çünki, orta seqmentdə istehsalçı alıcılara fərqli bir şey təklif etməyi planlaşdırır. Hətta Galaxy A seriyasına qatlanan büdcəvi modellər gətirmək planlarının olduğu da bildirilir. Əgər Galaxy A seriyasının arxasında kiçik bir ekran istifadə edilsə şirkət xeyli diqqət çəkməyi bacarar. Təsəvvür edin ki, orta seqmentdə arxa tərəfdəki ekranla selfi çəkilişləri etmək imkanı mövcud olan bir modelə alıcılar necə həvəslə yanaşar.
Hələlik patentin tam olaraq hansı modelləri əhatə edəcəyi naməlumdur. Eskizlərdə köhnə Galaxy Note 20 Ultra modeli istifadə olunduğundan üst seqment ilə də bu texnologiyanın yaxın olduğu düşünülür. Lakin ən pis halda xərclərdən uzaqlaşmaq istəyən Samsung şirkəti cihaz arxasına ekran yerləşdirəcək patent ilə ümumiyyətlə vidalaşa da bilər.
