Ötən ay İnnovasiya və Rəqəmsal İnkişaf Agentliyi xüsusi bir təlim keçirmişdi və “Tedroid” olaraq həmin təlimdə təmsil olunmaq fürsəti əldə etmişdik. “Azərbaycanda rəqəmsal iqtisadiyyatın quruculuğunda kütləvi informasiya vasitələrinin rolunun gücləndirilməsi” məqsədi ilə keçirilən 2 günlük təlimdəki əsas problemli mövzulardan biri də məqalənin başlığı ilə əlaqəli idi. Belə ki, müxtəlif media orqanları və nümayəndələri, startap anlayışının insanlar arasında niyə çətin aşılanmasını müzakirə etmişdi. İnsanların əksəriyyəti startap ekosistemindən uzaqdırsa və bu ekosistemlə maraqlanmaq istəyirsə bəzi çətinliklərlə qarşılaşır. Bu çətinliklər isə ilk olaraq startap terminlərinin insanlar arasında çətin başa düşülməsi və ya media orqanlarının startaplar barədə xəbərləri “startap” dilində yazmasından qaynaqlanır. Yəni mövzuya hakim olmayan insanlar müəyyən bir startap “terminləri” lüğətinin olmaması və ya kasadlığı səbəbilə mövzudan soyuyurlar.
Bəs media və startap ekosistemi insanlar üçün necə inteqrasiya olmalıdır?
Nəticədə bu sahədə inkişafı sürətləndirmək üçün, ilk məqsəd “startap ekosistemini” hamının başa düşəcəyi tərzdə insanlara aşılamaqdır. Hal-hazırda 2 əsas platforma startaplar üçün əsas rol oynayır. Bunlardan biri aktiv rola malik tanınmış veb-saytlar üzərindən startap xəbərlərinin paylaşılmasıdır. Veb-saytlar özlərinə elə hədəf seçməlidirlər ki, yazdıqları startap xəbərləri sahib olduqları bütün kütləni əhatə edə bilsin. Yəni məzmun sadə dildə yazılsın. Əks halda nə yazıldığını başa düşməyən insanlar ikinci dəfə startap xəbərlərini oxumağa maraq göstərmir.
İkinci əsas platforma isə televiziyada bu sahədə ayrılmış müəyyən proqramlar və ya xəbərlərdir ki, orada da bəzi problemlər müşahidə olunur. Televiziya dedikdə normal olaraq hansısa görüntünün, daha dəqiq desək video görüntünün ekrana verilməsi lazım gəlir. Lakin startapların əksəriyyəti özləri ilə bağlı çox az material yayımlayırlar. Bu səbəbdən televiziya kanalları startaplarla bağlı xəbər paylaşmaqda lazımi materialların qıtlığını çəkirlər. Bu hal veb-saytlarda daha az yaşanır. Çünki, xəbəri təqdim etməyə bir və ya iki şəkil kifayət edir. Televiziyada isə texnologiya sahəsində hansısa startapla bağlı xəbər hazırlamaq istəyən televeziya nümayəndəsi bir müddət sonra təkrarlanan “şablon” materiallar səbəbilə problemlə qarşılaşır.
Ona görə də startap təsisçiləri özləri barədə yetəri qədər məlumat və materialları hər kəsin rahatlıqla əldə edə biləcəyi bir mənbəyə yükləyərək öz sosial media hesablarında yerləşdirsələr media nümayəndələrinin də işi xeyli asanlaşar.
Ən vacib nüans isə yuxarıda da qeyd etdiyimiz kimi keyfiyyətli bir startap “terminləri” lüğətinin tərtib edilməsidir. Belə olduğu halda bu startap dünyasına yeni atılmış insanlar da rahatlıqla özlərini təkmilləşdirəcək, məqalələri oxuya biləcək və anlamaqda əziyyət çəkməyəcəklər. Ümid edirik qeyd etdiklərimiz heç olmasa bizim gördüyümüz bəzi boşluqların həll olunmasına müsbət təsir göstərə bilər.
