Yeni innovativ texnologiyaların ortaya çıxması və görülən əksər ənənəvi işlərin elektronlaşdırılmış formada icra edilməsi enerjiyə olan tələbi artırır. Bu müasirləşmə isə öz növbəsində enerjiyə olan tələbi inanılmaz dərəcədə artırır. Hal-hazırda yaşıl enerji deyə adlandırdığımız atmosferə zərərli tullantılar, qazlar buraxmayan külək, günəş, su enerjisi stansiyaları və.s dünyanın enerji ehtiyacını ödəyəcək qədər yetərli olmur. Digər bir tərəfdən bu stansiyaların qurulması üçün lazımi tələblər ödənə bilmir. Nəticədə başlıca olaraq istilik elektrik stansiyaları istifadə edilir və ciddi miqdarda atılan CO2 qazı “İstixana effektini” əmələ gətirir. Lakin çoxları bilməsə də nüvə enerjisi stansiyaları heç bir təhlükəli istixana qazı emissiyası yaratmır. Bu və digər səbəblərə görə də atom enerjisi stansiyalarına olan tələb 1 trilyon dollara çatmaq üzrədir.
Atom enerjisi stansiyalarındakı yüksəliş arzuolunmaz bir qəza baş vermədikcə davam edəcək
Birləşmiş millətlər təşkilatı tərəfindən keçirilən müzakirədə nüvə enerjisi sahəsində təhlükəsizlik tədbirlərinin görülməsi və standartların qəbul edilməsindən bəhs edilib. Əsas hədəf baş verə biləcək qəzanın on illərdir inkişaf etdirilən nüvə enerjisi sənayesinə vuracağı zərərin qarşısını almaqdır. Keçirilən müzakirənin fonunda ABŞ-nin Energetika naziri yaxın vaxtlarda atom enerjisi stansiyalarına olan tələbin qlobal olaraq 1 trilyon dollar dəyərinə çatacağını bildirib.
Aydın məsələdir ki, atom elektrik stansiyalarının varlığındakı əsas səbəblərdən biri istehsal edilən enerjinin əhəmiyyətli dərəcədə yüksək olmasıdır. Digər bir tərəfdən həqiqətən atmosferə atılan zərərli qazlar bu stansiyalarda xaric olunmur. Atom elektrik stansiyalarından yüksələn tüstü isə, soyutma sistemindən ayrılan su buxarı olur. Hal-hazırda atom elektrik stansiyalarının ən mənfi cəhəti baş verə biləcək qəzalar hesab edilir. Çünki, stansiyalardan birində yaşana biləcək qəza Çernobıl kimi elə böyük faciə yarada bilər ki, istixana effektindən belə qat-qat çox əziyyət çəkə bilərik. Üstəlik stansiyalardan çıxan radioaktiv tullantıların məhv edilməsinə də hələlik lazımi effektivlikdə həll yolu tapılmayıb.
Atom elektrik stansiyasına sahib ölkələrin çoxunda müasir sistemlərin 20-30 il əvvəl ilə müqayisədə tamamilə fərqli olduğu və bütün təhlükəsizlik tədbirlərinin görüldüyü bildirilir. Lakin yenə də yaranacaq 0,1%-lik xəta payı belə çoxlarını narahat edir.
