Apple mağazalara qaytarılan iPhone-ların yoxlanılması üçün yeni təhlükəsizlik sistemi hazırlayıb. Yeni texnologiya smartfonun qutusunu açmadan cihazın və onun komponentlərinin yerində olub-olmadığını müəyyənləşdirməyə imkan verəcək.
Bloomberg-in jurnalisti Mark Qurmanın (Mark Gurman) məlumatına görə, sistem Apple-ın daha əvvəl hazırladığı Presto texnologiyasına əsaslanır. Bu texnologiya iPhone-ların proqram təminatını satış qutusunu açmadan yeniləməyə imkan verirdi.
Yeni sistemin əsas məqsədi Apple Store mağazalarında məhsul qaytarılması zamanı baş verən oğurluq və saxtakarlıq hallarının qarşısını almaqdır.
Məlumata görə, bəzi şəxslər iPhone və digər Apple cihazlarını satın aldıqdan sonra onların aksesuarlarını və ya daxili komponentlərini çıxarır, daha sonra isə məhsulu yenidən qablaşdıraraq mağazaya qaytarırlar.
Bəzi hallarda isə cihaz tamamilə götürülür və boş qutu açılmamış məhsul kimi təqdim edilir. Oğurlanan cihazlar, aksesuarlar və ehtiyat hissələri sonradan ikinci əl bazarında satışa çıxarılır.
İndiyədək Apple Store əməkdaşları belə halları müəyyənləşdirmək üçün qaytarılan məhsulların qutularını açaraq onların içərisini yoxlamalı olurdular.
Lakin bu proses şirkət üçün əlavə problem yaradırdı. Belə ki, müştəri tamamilə yeni və istifadə olunmamış iPhone-u qaytarsa belə, yoxlama məqsədilə qutunun açılması məhsulun mağazadakı satış ehtiyatından çıxarılmasına səbəb olurdu.
Nəticədə, cihaz yenidən satışa təqdim edilməzdən əvvəl Apple-ın anbar və yoxlama sisteminə göndərilməli olurdu.
Yeni texnologiya isə bu prosesi dəyişəcək. Xüsusi avadanlıq vasitəsilə qutunun içindəki iPhone skan ediləcək və diaqnostik yoxlamalar aparılacaq.
Sistem cihazın mövcudluğunu və vəziyyətini yoxlamağa, həmçinin mümkün uyğunsuzluqları müəyyənləşdirməyə kömək edəcək. Bunun üçün məhsulun zavod qablaşdırmasını açmağa ehtiyac qalmayacaq.
Yoxlamadan uğurla keçən cihazların mağazanın inventar sistemindəki statusu dərhal yenilənə biləcək. Beləliklə, məhsulların qaytarılması prosesi sürətlənəcək və əlavə logistika xərcləri azalacaq.
Apple-ın bu addımı həm də mağazalarda inventar itkilərini azaltmağa yönəlib. Şirkət bununla saxtakarlıq hallarını daha erkən mərhələdə aşkar etməyi və istifadə olunmamış cihazların satışa daha tez qaytarılmasını hədəfləyir.
Məlumata görə, yeni yoxlama avadanlıqları artıq bu ayın əvvəlində Apple mağazalarına çatdırılıb və istifadəsinə başlanılıb.
Qeyd edək ki, Apple iPhone oğurluqlarına qarşı proqram təminatı səviyyəsində də müxtəlif təhlükəsizlik tədbirləri tətbiq edir. Lakin yeni sistem birbaşa mağazalarda məhsul qaytarılması zamanı baş verən saxtakarlıq hallarının qarşısını almaq üçün nəzərdə tutulub.
