Məşhur analiz şirkəti olan “Counterpoint Research” 2026-cı ilin ilk üç ayı üzrə dünyada ən çox satılan smartfonların siyahısını açıqlayıb. Siyahıya əsasən, qlobal smartfon bazarının mütləq lideri Apple-ın standart iPhone 17 modeli olub. Qlobal satışların tam 6%-ni təşkil edən bu cihaz, gözləntilərin əksinə olaraq özündən daha bahalı və güclü olan iPhone 17 Pro Max modelini belə geridə qoymağı bacarıb. Ümumilikdə isə reytinqin ilk üç pilləsini yalnız Apple cihazları ardıcıl olaraq iPhone 17, iPhone 17 Pro Max və iPhone 17 Pro modelləri zəbt edib.
Standart iPhone 17-nin bu qədər böyük maraqla qarşılanması və əvvəlki nəsillərdən daha çox satılması təsadüfi deyil. Apple-ın builki baza modelinə daha böyük yaddaş tutumu, inkişaf etmiş kamera sensorları və yüksək ekran yenilənmə tezliyi kimi üstün xüsusiyyətlər əlavə etməsi onu premium modellərə daha çox yaxınlaşdırıb. Nəticədə, istifadəçilər bu telefonu həm qiymət, həm də performans baxımından ideal seçim hesab ediblər. Cihaz xüsusilə ABŞ və Çin bazarlarında böyük sıçrayış edib, Cənubi Koreyada isə satışlarını düz üç dəfə artırıb.
Rəqabətin Android cəbhəsində isə vəziyyət fərqlidir. Samsung-un flaqman modelləri ilk onluğa düşə bilməsə də, şirkətin büdcə dostu hesab edilən “Galaxy A” seriyası əsl satış rekordu qırıb. Belə ki, siyahıdakı 10 yerdən 5-i məhz bu seriyanın payına düşüb. Dünyada ən çox satılan Android telefon isə Samsung Galaxy A07 4G olub. Bu model xüsusilə Yaxın Şərq, Afrika və Latın Amerikası kimi bölgələrdə güclü tələbatla qarşılaşıb. Dünyanın ən çox satılan 10-cu telefonu isə Xiaomi-nin uyğun qiymətli Redmi A5 modeli seçilib.
