Son illərdə Microsoft, xüsusilə bulud hesablama və süni intellektə investisiyalar qoymaqla bazar dəyərini sürətlə artırdı və dünyanın ən dəyərli şirkətləri arasında yerini möhkəmləndirib. Azure-un güclü böyüməsi, OpenAI tərəfdaşlığı və Copilot kimi generativ süni intellekt inteqrasiyaları şirkətin investorlar arasında qavrayışını gücləndirdi və bulud və süni intellekt yönümlü strategiyası ilə daha da böyüyəcəyi təəssüratını yaradıb. Lakin texnologiya nəhənginin açıqladığı son maliyyə nəticələri bu qavrayışa xələl gətirdi və səhmlərinin kəskin şəkildə aşağı düşməsinə səbəb oldu. Belə ki, ABŞ mərkəzli texnologiya nəhəngi olan Microsfot-un ümumi dəyərindən sadəcə 1 gündə 357 milyard dollar silinib.
Microsoft səhmləri dünən mənfəət hesabatının dərc olunmasından sonra satışdan sonra təxminən 10% düşdü. Bu düşüş, 2020-ci ilin mart ayından bəri ən kəskin gündəlik itki oldu və Microsoft-un bazar dəyərindən bir gündə 357 milyard dolları sildi. Şirkətin ümumi bazar dəyəri 3,22 trilyon dollara düşdü. İnvestorlar xüsusilə Azure və digər bulud xidmətlərinin böyümə göstəricilərinə diqqət yetirirdilər. Microsoft bu seqmentdə 39% artım qeydə alsa da, bazar gözləntiləri 39,4% təşkil edib. Fərq kiçik görünsə də, hətta onluq sapmalar belə trilyon dollarlıq şirkətlərdə əhəmiyyətli uyğunsuzluqlara səbəb ola bilər. Bundan əlavə, şirkət Windows-u da əhatə edən “Daha çox Şəxsi Hesablama” seqmentində üçüncü rüb üçün təxminən 12,6 milyard dollar gəlir proqnozlaşdırıb. Bu rəqəm də analitiklərin gözləntilərindən aşağı olub. Yeni rüb üçün nəzərdə tutulan əməliyyat marjası da bazar proqnozlarından aşağı olub.
Microsoft-un maliyyə direktoru Emi Hud Azure-un artımının daha yüksək ola biləcəyini iddia edib. Hudun sözlərinə görə, şirkət yeni yerləşdirilən bütün GPU tutumunu Azure müştərilərinə ayırsaydı, bulud artımı 40%-i keçə bilərdi. Lakin, Microsoft bu hesablama tutumunun bir hissəsini daxili süni intellekt layihələrinə və məhsullarına ayırmağı seçib ki, bu da qısa müddətdə maliyyə göstəricilərinə təzyiq göstərir. Buradakı vacib məsələ Microsoft-un məhdud məlumat mərkəzi və GPU tutumunu necə paylamasıdır. Azure müştərilərinə xidmət göstərərkən, şirkət həmçinin Microsoft 365 Copilot kimi süni intellektlə işləyən məhsullarını miqyaslandırmağa çalışır. Lakin analitiklər qeyd edirlər ki, Copilot hələ ki, gəlir artımını əhəmiyyətli dərəcədə sürətləndirməyib və istifadədə gözlənilən sıçrayış müşahidə olunmayıb. Buna görə də, süni intellekt investisiyaları hazırda Microsoft-a fayda vermir.
Digər tərəfdən, bu azalmaya baxmayaraq, Microsoft-un gələcəyinə daha nikbin baxış da mövcuddur. Bernstein analitikləri rəhbərliyin qısamüddətli səhm göstəricilərindən daha çox uzunmüddətli strateji mövqeləndirməyə üstünlük verdiyini vurğulayırlar. Onların fikrincə, Microsoft gələcəkdə məlumat mərkəzinin tutumunu şüurlu şəkildə daxili layihələrə köçürməklə daha yüksək əlavə dəyərli məhsullar yaratmağı hədəfləyir. Tutum məhdudiyyətləri azaldıqca bu yanaşma maliyyəyə daha müsbət təsir göstərə bilər. Şirkətin süni intellekt investisiyalarındakı bu kəskin azalma hələlik bütövlükdə sektora təsir etməyib. Proqram təminatına yönəlmiş texnologiya ETF-ləri eyni gündə azalma yaşasa da, Nasdaq indeksi daha məhdud itkilər yaşadı. Əslində, Meta güclü balans hesabatı və süni intellekt investisiyalarına aşıladığı inam sayəsində səhmlərində ikirəqəmli artım yaşayıb.
