Cənubi Afrikada yerləşən Botsvanada bütün elektrik enerjisini günəşdən istehsal edən Pangolin Voyager gəmisi üzən safari oteli kimi fəaliyyətə başlayıb. Gəminin 200 kvadrat metrlik damında 80 günəş paneli var və bu da otel tipli turist səyahətinin bütün ehtiyaclarını və daha çoxunu ödəmək üçün ümumilikdə 22 kVt enerji istehsal edir. Artıq enerji arxasınca çəkdiyi kiçik foto qayıqlarını doldurur.
Nəhəng 120 kVt-saatlıq batareya və 160 kVt-lıq mühərrikə malik qayıq maksimum 35 km/saat sürətə çata bilər. Sakit və təbii safari təcrübəsini təmin etmək üçün adətən gecə 8-9 saat aşağı sürətlə səyahət edir. Gündüzlər o, lövbər salır və turistləri vəhşi təbiəti müşahidə etmək və fotoqrafiya turları üçün nəzərdə tutulan kiçik elektrik qayıqlarına köçürür. 35 metr uzunluğunda, 10 metr enində və 68 tonluq bu gəmi, Böyük Britaniyada yerləşən Rad Propulsion tərəfindən hazırlanmış dörd RAD40 elektrik mühərriki ilə təchiz olunub. Bu mühərriklər, böyük pervaneleri, aşağı sürətli fırlanma momenti və geniş qanad quruluşu sayəsində, turbulentlik səbəbindən enerji itkisini azaltmaqla yanaşı, sakit bir gəzinti təmin edir.
Dəbdəbəli otaqları, restoranı və hətta foto redaktə otağı olan üzən otel 7-10 günlük turlar təklif edir. Uzun müddətdir fəaliyyət göstərən şirkət, indi bu turları vəhşi təbiəti narahat etmədən və ya zərər vermədən keçirmək imkanı təqdim edir. Pulcuqlu dəriyə malik yeganə məməli olan pangolindən ilhamlanan qayıq gələcəyə çox təsirli baxışlar təqdim edir. Oxşar layihələr müxtəlif ölkələrdə də inkişaf etdirilə bilər. Məsələn, boğazlarda fəaliyyət göstərən, nisbətən böyük damları və geniş üfüqi sahəsi olan qayıqlar xeyli miqdarda elektrik enerjisi istehsal edə bilər. Günəş panelləri ilə təchiz olunmuş qayıqlar öz enerji ehtiyaclarını ödəyə və pik saatlardan kənar vaxtlarda artıq elektrik enerjisini şəbəkəyə geri qaytarmaqla gəlir əldə edə bilərlər. Gecələr enerji dolduran bu qayıqlar həm yanacaq xərclərini azalda, həm də şəbəkənin enerji yükünü tarazlaşdıra bilər. Bu, dizel yanacağından istifadə etməyən qayıqlara şəbəkəni dəstəkləyərkən gəlir əldə etməyə imkan verir.
