Albaniyanın baş naziri Edi Rama, dövlət satınalmalarına nəzarət edəcək dünyanın ilk süni intellekt əsaslı hökumət nazirinin təyin olunduğunu elan edib. Rama bəyan edib ki, yeni üzvün süni intellekt sistemi ölkə administrasiyasında “korrupsiyadan azad” sistemi təmin edəcək.
May seçkilərində parlaq qələbə qazanan Rama, Sosialist Partiyasının iclasında təqdim etdiyi yeni kabinetinin üzvləri arasında “Diella” adlı virtual naziri də təqdim edib. “Diella” alban dilində “günəş” deməkdir. Diella bütün dövlət satınalmaları ilə bağlı qərarların qəbuluna cavabdeh olacaq, hər bir ictimai fondun tamamilə şəffaf və korrupsiyasız şəkildə idarə olunacağını vurğulayır. Yanvar ayında süni intellektlə işləyən virtual köməkçi kimi təqdim edilən Diella ənənəvi alban geyimində olan qadına bənzəmək üçün hazırlanıb. İlkin olaraq o, rəsmi e-Albaniya platforması vasitəsilə vətəndaşların sənədlərə və xidmətlərə çıxışını asanlaşdırmaq üçün hazırlanmışdır. Rəsmi məlumatlara görə, bu virtual köməkçi 36 600 rəqəmsal sənədi redaktə edib və təxminən 1000 xidmət göstərib.
Dördüncü müddətə seçilən Rama yaxın günlərdə yeni kabinetini parlamentə təqdim etməyi planlaşdırır. Korrupsiyaya qarşı mübarizə və xüsusən də dövlət idarəçiliyində şəffaflığın təmin edilməsi Albaniyanın Avropa İttifaqına üzvlük yolu üçün kriteriya kimi vurğulanır. Baş nazir Rama 2,8 milyon əhalisi olan Balkan ölkəsini 2030-cu ilə qədər Avropa Birliyinə cəlb etmək məqsədini irəli sürür. Uzun müddətdir ki, elmi fantastika yazıçıları və texnologiya mütəxəssisləri süni intellektin bir gün insan idarəçiliyindən daha təsirli və qərəzsiz gücə çevrilə biləcəyini iddia edirlər. Mürəkkəb hökumət bürokratiyaları, korrupsiya riskləri və siyasi təzyiqlər kimi amillərin süni intellekt üçün əhəmiyyətsiz olduğu və daha şəffaf və ədalətli qərarların qəbul edilməsinə imkan verdiyi iddia edilmişdir. Təbii ki, indiyə qədər bütün bu fikirlər nəzəri olaraq qalıb. Bununla belə, belə görünür ki, Albaniya hökumətin avtomatlaşdırılması istiqamətində ilk addımı atan ilk ölkələr sırasındadır.
