Robot texnologiyaları istehsalda irəliləyişlərlə yeni ölçülər qazanmağa davam edir. Enerji menecmenti bu sahədə ən mühüm problemlərdən biri kimi önə çıxır. Bu problemi həll etmək istəyən şirkətlər robotların daha avtonom işləməsinə imkan verən yeni sistemlər hazırlayır. Beləliklə, öz batareyasını sadəcə 3 dəqiqə ərzində dəyişə bilən bu insanabənzər robot bütün diqqətləri öz üzərinə cəlb etməyib bacarıb.
Çində yerləşən UBTech şirkəti robototexnika sahəsində diqqətəlayiq bir addım atıb. Şirkətin “Walker S2” adlı insanabənzər robotu insan köməyi olmadan öz batareyasını dəyişə bilir. Bu yeni texnologiya, xüsusilə istehsal mühitində robot enerjisinin idarə edilməsində tamamilə inqilab edə bilər. Walker S2 adlanan bu robot batareya dəyişikliklərini tamamilə avtonom şəkildə idarə edə bilir. Nümayişə görə, robot təxminən 3 dəqiqə ərzində öz batareyasını çıxarıb dəyişdirə bilir. Bundan əlavə, o, avtonom şəkildə şarj stansiyasına gedə, boş batareyanı çıxara, ehtiyatı daxil edə və qaldığı yerdən işləməyə davam edə bilər.
UBTech bu robotu sənaye mühitlərində fasiləsiz xidmət göstərmək üçün hazırlayıb. Walker S2-nin ikili akkumulyator sistemi elektrik şəbəkəsinin kəsilməsi zamanı aktivləşərək robotun işləməyə davam etməsinə şərait yaradır. Robot həm də tapşırığın aktuallığından asılı olaraq batareyanın dəyişdirilməsi və doldurulması arasında seçim edə bilər. Şirkət həmçinin robotların birlikdə işləməsini təmin edən BrainNet sistemi üzərində işləyir. Bu sistem Walker seriyasındakı robotlara ümumi süni intellekt şəbəkəsi vasitəsilə istehsal xəttində sinxron işləməyə imkan verir. Bu, onlara montaj, keyfiyyətə nəzarət və materialla işləmə kimi vəzifələri daha səmərəli yerinə yetirməyə imkan verir. UBTech tərəfindən təqdim edilən bu sistemlər robotların istehsalda təkcə fiziki tapşırıqları yerinə yetirmədiyini, həm də enerjinin idarə edilməsində və tapşırıqların koordinasiyasında fəal rol oynadığını nümayiş etdirir.
