Aviasiyada ənənədən kənara çıxan Otto Aviation, pəncərəsiz iş təyyarəsi Phantom 3500 ilə hava daşımalarını yenidən təyin etməyə hazırlaşır. “Pəncərələr deyil, səmərəlilik önəmlidir” deyən şirkət, klassik təyyarə dizaynının ayrılmaz parçası olan pəncərələri tamamilə aradan qaldıraraq aerodinamik performansı zirvəyə çatdırır.
Təyyarə dizaynı ilə maraqlanan mühəndislər üçün pəncərələr təkcə struktur problemi deyil. Belə ki, çəki və aerodinamik sürtünmə nəticəsində yanacaq səmərəliliyinin azalmasının da əsas günahkarları onlardır. Phantom 3500 bu problemi kökündən həll edir. Pəncərəsiz gövdəsi hava axınının gövdə və qanadlar boyunca paralel təbəqələrdə, başqa sözlə, “laminar” şəkildə axmasına imkan verərək, sürüklənməni minimuma endirir. Bu, daha az yanacaq sərfiyyatı, daha uzun məsafə və daha yüksək sürət deməkdir.
Otto Aviation Phantom 3500-ü inkişaf etdirmək üçün əvvəlki Celera 500L prototipindən uçuş məlumatlarını Dassault Systemes-in 3DEXPERIENCE platforması ilə birləşdirib. Hədəflənmiş birinci mərhələdə səmərəliliyin artırılması 35 faizdir. Gələcəkdə bu rəqəm 50 faizə qədər arta bilər. Bəs sərnişinlər? Həcmi təxminən 22,65 kubmetr olan dəbdəbəli kabinənin ənənəvi mənada pəncərələri yoxdur. Bunun əvəzinə tavan da daxil olmaqla daxili səthlərə tam ölçülü, yüksək keyfiyyətli ekranlar yerləşdirilir. Bu ekranlar xarici dünyanı real vaxt rejimində göstərməklə sərnişinlərə açıq kabin hissi verir. Başqa sözlə, klostrofobiyadan aqorafobiyaya zərif keçid baş tutur.
Phantom 3500, hər biri 3600 lb (16 kN) olan bir cüt Williams International FJ44 ilə təchiz edilir, rəqib Bombardier və Embraer təyyarələri isə 6,500-7,300 lb çəkiyə malik Honeywell-in HTF7000 ailəsinin variantlarından istifadə edir. Phantom 3500 51 000 fut (15 545 metr) hündürlüyə çata bilir. Təyyarə 0.8-Mach 1.2 kimi müəyyən edilmiş transonik sürət bölgəsində kruiz etmək üçün nəzərdə tutulmuşdur. Onun 3200 dəniz mili (təxminən 5926 km) məsafəsi olması hədəflənir. Təyyarənin rəqibləri ilə müqayisədə əməliyyat xərclərinin 50 faiz aşağı olacağı, karbon emissiyalarının isə 80 faiz azalacağı gözlənilir. Bundan əlavə, qısa və enli qanad dizaynı sayəsində uzunluğu cəmi 1067 metr olan uçuş-enmə zolaqlarından qalxıb-eniş edə biləcək. Otto Aviation, 2027-ci ildə keçiriləcək ilk uçuş sınaqları ilə, təyyarənin inkişaf dövründə mühüm mərhələ olan ilkin dizayn baxışını oktyabr ayına qədər tamamlamağı planlaşdırır. Şirkət Phantom 3500-ü 2030-cu ilə qədər kommersiya uçuşlarına hazır etməyi hədəfləyir
