Keçən həftə Kennedi Kosmik Mərkəzində keçirilən avtomobil tədbirində sürücüsüz Maserati MC20 Coupe 318 km/saat sürətə çataraq avtonom avtomobillər üçün yeni sürət rekordu təyin edib. Beləliklə, rekord sürüş üçün Maserati İtaliyanın ən böyük texniki universiteti olan Politecnico di Milano tərəfindən hazırlanmış avtonom sürücülük proqramı ilə təchiz edilib. Ümumiyyətlə, İtalyan avtomobil nəhəngi olan Maserati daha əvvəl də bir sıra rekordları qırmağı bacarsa da, bu dəfə həm də bir ilkə imza atıb.
CES 2025 zamanı Las Vegas Motor Speedway-də keçirilən Indy Autonomous Challenge ilə də işləyən komanda, Maserati-ni ən ideal vəziyyətə gətirmək üçün aylarını sərf edib. Xatırladaq ki, əvvəlki rekord 2022-ci ilin aprelində IAC AV-21 yarış avtomobili ilə 309 km/saat sürətə nail olan Indy Autonomous Challenge və PoliMOVE tərəfindən müəyyən edilmişdi. Bununla belə, 2020-ci ildə buraxılan və sürücüsüz hala gətirilən Maserati MC20 modeli bu rekordu yeniləməyi bacarıb. Qeyd edək ki, cəlbedici eksteryerə sahib olan kupe 318 km/saat sürətə çataraq rekordu əlinə alıb.
Ümumiyyətlə, adı çəkilən Maserati MC20 modeli öz gücünü 3.0 litrlik Maserati Nettuno 90° ikiturbo V6 mühərrikdən əldə edir. Avtomobilin nəhəng mühərriki 621 at gücü hasil edir. Bu nailiyyət isə təkcə avtonom yarış avtomobilinin əldə etdiyi ən yüksək sürəti qeyd etdiyinə görə deyil, həm də avtonom idarəetmə sisteminin əsasını təşkil edən alqoritmlərin etibarlılığını sınaqdan keçirdiyinə görə əhəmiyyətlidir. Komanda burada əldə etdiyi məlumatlarla avtonom nəqliyyat vasitələrinin təhlükəsizliyini artırmağı hədəfləyir. Qeyd edək ki, MC20 modeli hazırda 293 min dollar qiymət etiketinə sahibdir.
