Steam bu dəfə xoşagəlməz hadisə ilə gündəmə gəlib. Belə ki, ən etibarlı rəqəmsal oyun platformalarından biri olan Steam-də bu dəfə viruslu oyun aşkar edilib. Pirat temalı sağ qalma oyunu PirateFi elə Steam tərəfindən aşkar edilərək silinib. Qeyd edək ki, bu oyun istifadəçilərin brauzer kukilərini oğurlayan Trojan.Win32.Lazzzy.gen adlı virusa sahib imiş.
Oyunun Steam-də ən azı bir həftə mövcud olduğu və silinmədən əvvəl 800 ilə 1500 dəfə yükləndiyi bildirilir. Bəzi oyunçular isə PirateFi-nin təqdimat şəkillərinin əslində Easy Survival RPG adlı başqa bir oyundan oğurlandığını görmüşdülər. Bundan əlavə, antivirus proqramı oyun fayllarını “Trojan.Win32.Lazzzy.gen” kimi qeyd edib. Qeyd edək ki, bu tip troyanlar hakerlərə istifadəçilərin onlayn hesablarına daxil olmaq imkanı verir. Məsələni daha da ciddiləşdirən digər hadisə isə özünü PirateFi-nin tərtibatçısı kimi təqdim edən şəxsin Telegram-da “oyundaxili söhbət moderatoru” axtarmağa başlaması olub.
Ehtimal olunur ki, istifadəçiləri ödənişli iş təklifləri ilə cəlb etməyə çalışan bu şəxs zərərli proqramı daha geniş auditoriyaya yaymağı hədəfləyir. Steam artıq, viruslu oyunu öz platformasından çıxarıb və təsirlənən istifadəçilərə bir sıra xəbərdarlıqlar edib. İstifadəçilərə tam virus yoxlaması həyata keçirmələri və kompüterlərində şübhəli proqramların olub olmadığını yoxlamaları tövsiyə olunur. Habelə, lazım gələrsə, onlara Windows-u yenidən quraşdırmaq tövsiyə edilib.
