Yaponiya karbonsuz enerji istehsalı məqsədinə doğru mühüm addım atmağa hazırlaşır. Layihə çərçivəsində Yaponiya Atom Enerjisi Agentliyi (JAEA) qabaqcıl Yüksək Temperaturlu Qaz Soyudulmuş Reaktor (HTGR) texnologiyasından istifadə edərək hidrogen istehsalı müəssisəsi qurmağı planlaşdırır. Beləliklə, əgər layihə reallaşarsa dünyanın ilk nüvə enerjisi ilə işləyən hidrogen istehsalı obyekti məhz Yaponiyada olacaq.
Adi nüvə reaktorlarından fərqli olaraq, HTGR su əvəzinə helium qazı ilə soyudulur. Bu yolla daha yüksək temperaturlara çata bilər. JAEA bu reaktorun yaratdığı yüksək istilikdən istifadə edərək karbon emissiyaları olmadan hidrogen istehsal etməyi hədəfləyir. Qeyd edək ki, Adi reaktorlar təxminən 300 dərəcə temperatura çatsa da, HTGR-lər 800 dərəcədən yuxarı temperaturda işləyə bilir. Layihəyə cavabdeh şəxs olan Nariaki Sakaba bildirib ki, Biz ümid edirik ki, 2030-cu ilə qədər hidrogen istehsalında uğur qazanacağıq və onu dünyanın ən yaxşı texnologiyası kimi inkişaf etdirəcəyik”.
JAEA yüksək temperaturlu helium qazının dövriyyəsini təmin etmək üçün hidrogen qurğusunu və HTTR-ni borularla birləşdirməyi planlaşdırır. Bu yüksək temperatur su və metanın kimyəvi reaksiyaya girməsinə səbəb olaraq böyük miqdarda hidrogen istehsal etmək üçün istifadə olunacaq. Yaponiya Atom Enerjisi Agentliyi layihə üçün rəsmi müraciətini 2025-ci ildə Yaponiya Nüvə Tənzimləmə Agentliyinə (NRA) təqdim etməyi planlaşdırır. Təsdiq alınarsa, obyektin tikintisinə 2026-cı ildə başlanacaq. İlk hidrogen istehsalının 2030-cu ildə həyata keçirilməsi planlaşdırılır.
