Texnologiya dünyasında innovasiyanın heç bir həddi yoxdur. Keçən il biz Humane AI Pin və Rabbit R1 kimi süni intellektlə işləyən cihazların müxtəlif formaları ilə tanış olmuşduq. Bu il isə Bu il San-Fransiskoda yerləşən Based Hardware tərəfindən hazırlanmış “Omi” adlı sikkə ölçülü cihaz təqdim edilib. Beləliklə, CES2025 sərgisində təqdim olunan düşüncələrinizi oxuyan süni intellekt cihazı Omi bütün diqqətləri öz üzərinə cəlb edib.
Omi, süni intellektlə işləyən köməkçi kimi istifadəçilərin həyatını asanlaşdırmaq məqsədi daşıyır və bunu (sözün əsl mənasında) başınıza yapışdırmaqla edir. Omi-nin ən təəccüblü xüsusiyyətlərindən biri onun açıq mənbə olmasıdır. Bu yolla texnologiya həvəskarları cihazla təcrübə keçirə və fərdi tətbiqlər hazırlaya bilərlər. Şirkət həmçinin bu təcrübələr üçün tərtibatçı dəstləri təklif edir. Omi başınıza, paltarınıza yapışa bilər və ya boyunbağı kimi istifadə oluna bilər. Üzərindəki daxili batareya bir dəfə doldurulmaqla günlərlə istifadə etməyə imkan verir. Omi hər zaman açıq qaldığından onun aktivləşməsi üçün hər hansı sözü səsləndirməyə də ehtiyac yoxdur. Cihaz daim GPT-4o vasitəsilə danışıqlarınızı dinləyir və idarə edir və həmçinin hər bir istifadəçi üçün konteksti yadda saxlamaqla fərdiləşdirilmiş tövsiyələr təklif edə bilər. Cihaz canlı səsi insan səviyyəsində dəqiqliklə yaza bilir.
Cihaz internetə qoşulduğu müddətdə görüşlər, söhbətlər və səsli qeydlər, ani xülasələr və sual-cavab imkanları üçün canlı mətn transkripsiyasını təmin edə bilər. Omi həmçinin məşhur proqramlar və xidmətlərlə inteqrasiya edə bilər. Məsələn, o, Google Calendar, Notion və Google Drive kimi 250-dən çox proqrama giriş təmin etməklə istifadəçi təcrübəsini zənginləşdirir. Omi istehsalçıları istifadəçi məlumatlarının tam şifrələndiyini və cihazdakı bütün məlumatların bir toxunuşla silinə biləcəyini bildirir. Bundan əlavə, cihaz itirilsə belə, smartfon proqramı vasitəsilə məlumatlarınıza daxil ola və silə bilərsiniz. 2025-ci ilin ikinci rübündə buraxılması planlaşdırılan bu modul ilk növbədə sifariş verən ilk 5000 istifadəçiyə təklif olunacaq. Hal-hazırda $89 qiymətinə əvvəlcədən sifariş vermək mümkündür. Düşüncələrinizi oxuyan süni intellekt cihazı Omi-ni sifariş etdikdən sonra isə 2025-ci ilin 2-ci rübündə təhvil ala biləcəksiniz.
