ABŞ hökuməti internetə qoşulan cihazların təhlükəsizlik səviyyəsini müəyyən edən yeni etiketləmə sistemini elan edib. Beləliklə, internetə qoşulan bütün növ cihazlar artıq yeni dövrdə etiketlənəcək və onların təhlükəsizliyi asanlıqla bəlli olacaq.
Artıq internetə qoşulan cihazların təhlükəsizliyini göstərən etiketlə satışa çıxarılacağı açıqlanıb. Ağ Ev ağıllı cihazlar üçün yeni etiketləmə sistemini elan edib. Yeni kibertəhlükəsizlik etiketi istifadəçilərə cihazların təhlükəsizlik səviyyələrini tez qiymətləndirməyə kömək edəcək. Qeyd edək ki, yeni etiket daşıyan məhsullar, ABŞ hökuməti tərəfindən müəyyən edilmiş kibertəhlükəsizlik meyarlarına cavab vermək üçün testlərdən keçməlidir. Qeyd olunan cihazlara ağıllı termostatlar, uşaq monitorları, işıqlar və təhlükəsizlik kameraları daxildir. Yəni internetə qoşulan bütün cihazlar birmənalı olaraq etiketlənəcək.
Etiket “Cyber Trust Mark” adlanacaq və mikroçip tipli detallarla bəzədilmiş stilizə edilmiş qalxan loqosu olacaq. İnternetə qoşulmuş cihazların təhlükəsizliyi bu etiket sayəsində istifadəçilər üçün asan başa düşüləcək. Etiketi almaq istəyən şirkətlər ABŞ Milli Standartlar və Texnologiya İnstitutu tərəfindən müəyyən edilmiş təhlükəsizlik standartlarına cavab verməlidir. Təhlükəsizlik standartı testləri cihazların kibertəhlükəsizlik baxımından kafi olub olmadığını yoxlayacaq. Ağ Ev, Cyber Trust Mark etiketinin zamanla daha çox cihazı əhatə edəcəyini açıqlayıb. Etiketi olan cihazların bu il rəflərə çıxması gözlənilir. Etiketin könüllü xarakteri istifadəçilərə məlumatlı seçimlər etməyə imkan verəcək.
