Məşhur mesajlaşma platforması Telegram 2024-cü ili uğurla başa vurub. Belə ki, Telegram-ın gəliri ilk dəfə olaraq bu il, yəni 2024-cü ildən 1 milyard dolları ötüb. Telegram-ın yaradıcısı Pavel Durov şirkətin ilk dəfə qazanc əldə etdiyinə diqqət çəkərək, bu il gəlirlərinin 1 milyard dolları keçdiyini bildirib.
Beləliklə, Telegram böyük bir maliyyə mərhələsinə çatıb. Pavel Durov, Telegram-ın 2024-cü ildə qazanc əldə etməyə başladığını və bunun 2022-ci ildə başlatdıqları, bu gün 12 milyondan çox ödənişli abunəçisi olan və şirkət üçün mühüm gəlir mənbəyi olan premium abunə sayəsində baş verdiyini etiraf edib. Ümumiyyətlə, aylıq 950 milyondan çox aktiv istifadəçisi olan Telegram, biznes üçün funksiyalar buraxıb, hətta reklam gəlirlərinin bölüşdürülməsi xidmətini əlavə edib, məzmun yaradıcılarına kanallarda ödənişli məzmun vasitəsilə pul qazanmağa imkan verib və mini proqramlar mağazası açıb.
Durov bu ilin əvvəlində şirkətin 2025-ci ildə gəlirliliyə çatacağını və gələcəkdə birjaya çıxmağı hədəflədiklərini də bildirib. Bütün yuxarıda sadalanan yeniliklər əslində şirkətin artıq maliyyə tərəfinə fokuslandığını bir daha ön plana çıxarır. Bundan əvvəl, şirkət qazanc tərəfində rəqiblərindən xüsusilə Meta şirkətinin digər platformalarından geridə qalırdı. İndi isə Telegram-ın gəliri 1 milyard dolları ötməklə yeni bir mərhələyə keçid edib. Habelə, gələn il yüksək gəlirlilik əldə etmək üçün Telegram-ın bir sıra xidmətlər və yeniliklər əlavə edəcəyi gözlənilir.
