İspaniyanın şimalında, demək olar ki, kimsəsiz bir küçədə çəkilmiş Google Maps görüntüsü itkin düşmüş şəxslə bağlı işin həllinə kömək edib. Belə ki, oktyabr ayında Tajueco adlı kiçik bir kənddə çəkilmiş bu görüntülər, bir adamın qırmızı rəngli avtomobilin baqajına ağ çuval yüklədiyi anı çəkib. Google Maps aləti ilə çəkilmiş bu şəkil və digər fotolar polis tərəfindən kritik sübut kimi istifadə edilib. Bu dəlil keçən il yoxa çıxan bir adamın məhkəmə işində iki nəfərin həbsinə səbəb olub.
Beləliklə, gündəlik həyatda istifadə etdiyimiz və yol soruşduğumuz Google Maps bu dəfə qeydə aldığı görüntüsü ilə qətl hadisəsinin üstünü açıb. Hadisənin kökləri 2023-cü ilin noyabrına gedib çıxır. İspaniyada yaşayan Kuba vətəndaşının itkin düşdüyü barədə qohumu məlumat verib. İddiaya görə, bu şəxs İspaniyanın Soria bölgəsinə keçmiş ortağı olduğu düşünülən qadını tapmaq üçün gəlib. İtkin düşən şəxsin qohumu bir sıra şübhəli mesajlar aldıqdan sonra polisə xəbər verib. Mesajlarda kişinin başqa bir qadınla tanış olduğu, İspaniyanı tərk edərək telefonundan qurtulacağı deyilirdi. İstintaq şübhəli mesajların diqqət mərkəzində olan kubalı kişinin keçmiş ortağı və romantik münasibətdə olduğu güman edilən başqa bir adama yönəlməsindən sonra başlayıb. Keçən ay polis kubalının itməsi və öldürülməsi ilə bağlı cütlüyü həbs edib. Bir neçə həftə sonra yaxınlıqdakı kənd qəbiristanlığında itkin düşmüş şəxsə aid olduğu güman edilən insan cəsədi tapılıb.
Polis Google Maps-in istintaq prosesində oynadığı rolu xüsusilə vurğulayıb. Belə ki, polis tərəfindən verilən açıqlamada, “Müstəntiqlərin cinayəti açmaq üçün istifadə etdiyi ipuculardan biri xəritəçəkmə tətbiqini nəzərdən keçirərkən aşkar edilən görüntülərdir” deyilib. Görüntülər cinayətin törədilməsində istifadə olunan avtomobilin şəxsiyyətini müəyyən etməyə imkan verib. Polis hadisə ilə bağlı istintaqın davam etdiyini bildirsə də, əlavə təfərrüatları açıqlamaqdan imtina edib.
