Sizcə, adi bir smartfona Windows əməliyyat sistemi quraşdırmaq mümkün ola bilər?. Bu sualın cavabını tapmağa çalışan bir Reddit istifadəçisi öz android smartfonuna Windows 11 quraşdırmağı bacarıb. Lakin, ortaya çıxan nəticə, bu fikrin heç də yaxşı fikir olmadığını bir daha sübut edib.
Microsoft şirkətinin uzun müddətdir ki, təkmilləşdirdiyi və hələ də ideal vəziyyətə gəlib çatmayan Windows 11 əməliyyat sistemi maraqlı hadisə ilə gündəmə gəlib. Belə ki, bir Reddit istifadəçisi öz android smartfonuna Windows 11 quraşdıraraq bütün diqqətləri öz üzərinə cəlb etməyi bacarıb. “anH0I” istifadəçi adı ilə Redditdə paylaşılan şəkildə Windows 11-in quraşdırıldığını birbaşa telefon ekranından görmək olar.
Onun sözlərinə görə, o, buna Android telefonlarına Windows quraşdırmaq imkanı verən Renegade Project ilə nail olub. Bununla belə, bu alətlə belə, onun düzgün işləməsi təxminən 8 saat çəkib. Yəni bu proses ümumilikdə heç də asan hesab oluna bilməz. Postu görən insanlar dərhal istifadəçiyə Windows 11 ilə işləyən telefonu performansı ilə bağlı suallar ünvanlayıblar. Təxmin edə biləcəyiniz kimi, bu android cihaza Windows əməliyyat sistemini quraşdırmaq heç də uğurlu nəticələr verməyib. İstifadəçinin dediyinə görə, iş o həddə çatıb ki, quraşdırdıqdan sonra cihazın batareyası korlanıb. Hətta batareya sadəcə 2 saatda tükənib. Bundan əlavə, o, telefonun çox tez qızdığını da əlavə edib.
