Twitter tətbiqi illərdir gətirmədiyi yenilikləri bir-bir gətirməyə başlayıb. Belə ki, ötən gün Twitter idarə heyətinin Elon Musk-ın 44 milyard dollarlıq satın alma təklifini də rəsmi formada təsdiqlədi. Ikinci mərhələdə İnvestorlar da təklifi qəbul etdiyini təsdiqlədikdən sonra Elon Musk tərəfindən platformanın alışı üçün ödəniş ediləcək. Elon Musk-ın əsas hədəfi Twitter-i yaxın gələcəkdə TikTok kimi populyar sosial media tətbiqinə çevirməkdir. Bununla bağlı ilk addım isə nəhayət atılıb. Məlum məsələdir Twitter tətbiqin əsas problemi yazılmış paylaşımlardakı (tvitlərdəki) simvol limitinin çox az olmasıdır. Lakin təqdim edilmiş “Notes” yeniliyi ilə birlikdə Twitter platformasında uzun yazılar, daha doğrusu məqalələr yazmaq mümkün olacaq.
Twitter Notes xüsusiyyəti uzun məqalələr yazmağa imkan yaradacaq
Hal-hazırda bir neçə tanınmış istifadəçi, daha doğrusu yazar tərəfindən bu yenilik test edilməkdədir. Aşağıdakı videodan da gördüyünüz kimi yeni “Notes” xüsusiyyəti istifadəçi üçün geniş imkanlar gətirir. Bir məqalə hazırlamağa bənzər formada şəkillər, GİF-lər, videolar, hətta başqa tvitləri belə öz yazılarınıza əlavə edə bilirsiniz. 280 simvol limitindən birbaşa olaraq belə bir geniş imkan vəd edən yeniliyi insanların necə qarşılayacağını görmək üçün biraz vaxt lazımdır.
Bu yenilik xüsusilə Çində fəaliyyət göstərən Weibo tətbiqindəki məqalələr bölməsinə çox bənzəyir. Çin xaricində mövcud olan ən populyar sosial media platformalarında belə bir şey ilk dəfədir ki, istifadəyə verilir. Bəzi platformalarda bu tip məqalələr paylaşmaq mümkün olsa da sosial şəbəkə tipli platformalarda bu cür xüsusiyyət o qədər də yayılmış bir şey deyil.
Twitter Write və ya Notes yeniliyini test edən insanların yazısı ilə təəssüf ki, Azərbaycandan tanış ola bilməyəcəksiniz. Yenilik hələ ki, yalnız ABŞ-da yaşayan insanlar tərəfindən testi həyata keçirən şəxslərin profilinə baxaraq görülə bilər. Əslinə qalsa Twitter platforması Azərbaycanda elə də inkişaf etməyindən çox az insan üçün “Notes” yeniliyinin necə işlədiyi maraqlı olacaq. Bundan sonra istifadəçilərin gözlədiyi ən əsas yeniliklərdən biri isə sadə tvitlərin simvol limitinin artırılmasıdır. 280 simvol limiti ən azından biraz da artırılsa istifadəçilər öz fikirlərini daha rahat ifadə edə bilər.
