Samsung-un yeni flaqman smartfonu Galaxy S25 Ultra-nın dizaynını əks etdirən yeni görüntülər ortaya çıxıb. Belə ki, uzun müddətdir gözlənilən Samsung Galaxy S25 Ultra modeli internetdə işlək halda canlı olaraq görüntülənib.
Əslində son dövrlərdə internetə sızdırılan məlumatlar sayəsində artıq Galaxy S25, 25+ və S25 Ultra-dan nə gözlədiyimizlə bağlı demək olar ki, heç bir sual qalmayıb. İndi isə Galaxy S25 Ultra işlək halda canlı olaraq görüntülənib. Sızdırılan görüntülər keçmiş xəbərlərin çoxunu təsdiqləyir. Buna uyğun olaraq Galaxy S25 Ultra, Ultra modellərinin imzası halına gələn əyri ekran dizaynı yerinə düz dizayna üstünlük verəcək. Şəkillər bizə telefonun alt hissəsini də göstərir. Burada S-Pen yuvası, dinamik, mikrofon və SİM kart yuvası ilə əhatə olunmuş USB-C portu var.
Smartfon sələfləri kimi yüksək ekran-gövdə nisbətinə sahib olacaq. Ümumilikdə isə yuvarlaq künclərə üstünlük verilib. Əlavə olaraq, başqa bir görüntüdə ekranda One UI 7.0-ın şarj bildirişini görə bilirik. Bu isə cihazın həqiqətən də Galaxy S25 Ultra olduğunu təsdiqləyir. Əvvəlki məlumatlara görə, Galaxy S25 Ultra Snapdragon 8 Elite prosessoru, 200MP əsas kamera və üç 50MP ultra geniş, telefoto və super telefoto kamera, Android 15 əsaslı One UI 7.0 proqramı ilə gələcək. Smartfon yəqin ki, yeddi illik Android əməliyyat sistemi və təhlükəsizlik yeniləmələri alacaq. Habelə, flaqman smartfonun sələfindən 0.4 mm daha nazik olacağı bildirilir.
