Yeni hesabata görə, ABŞ Ədliyyə Nazirliyi internetdə axtarış tərəfində qurulan inhisarı qırmaq üçün dünyanın ən böyük texnologiya şirkətlərindən biri olan Google-a Chrome-u satması üçün təzyiq göstərəcək. Beləliklə, ABŞ Ədliyyət Nazirliyi Google şirkətinin Chrome brauzerini satmağa məcbur etmək üçün əlindən gələni edəcək.
ABŞ Ədliyyə Departamenti texnologiya nəhəngi Google-a qarşı əlamətdar antiinhisar məhkəməsində şirkətdən məşhur Chrome brauzerini satmağa məcbur edilməsini tələb etməyə hazırlaşır. Bu addım həm onlayn axtarış bazarını, həm də sürətlə inkişaf edən süni intellekt sektorunu yenidən formalaşdırmaq potensialına malikdir. Qeyd edək ki, Google-un ana şirkəti Alphabet-ə qarşı məhkəmə prosesi ABŞ prezidenti Donald Trampın dövründə başlayıb və prezident Co Baydenin dövründə də davam edib. Maraqlısı budur ki, Ədliyyə Nazirliyinin tələbləri arasında Google-un axtarış sistemi və süni intellekt layihələri üçün verilənlərin lisenziyalaşdırılması tələbləri də var. Federal hakim Amit Mehta bu tövsiyələri qəbul edərsə, texnologiya sektorunda böyük dəyişikliklər baş verə bilər. Mehta son aylarda Google-un monopoliya olduğuna qərar vermişdi.
ABŞ təxminən 20 il əvvəl oxşar şəkildə Microsoft-u parçalamağa çalışsa da, nəticə uğursuz olmuşdu. Ümumiyyətlə, dünyanın ən populyar veb brauzerinə sahib olmaq Google-un reklam biznesinin açarıdır. Şirkət daxil olmuş istifadəçilərin fəaliyyətini görə bilər və bu məlumatlardan gəlirinin əsas hissəsini təşkil edən reklamları daha effektiv hədəfləmək üçün istifadə edə bilər. Google həmçinin AI məhsulu Gemini-ni göstərmək üçün Chrome-dan istifadə edir. StatCounter-in məlumatına görə, Chrome brauzeri brauzer bazarının 66 faizində üstünlük təşkil edir.
