Apple brendinin gələn il təqdim edəcəyi yeni iPhone 17 Slim modeli əslində gözlənildiyi qədər incə olmaya bilər. Belə ki, şirkətin, nazik batareyaalr hazırlamaqda çətinlik çəkdiyi bildirilir. Maraqlısı budur ki, hazırda Samsung brendində də oxşar problemlər mövcuddur.
Bu səbəbdən də, Apple-ın gələn il təqdim edəcəyi iPhone 17 Slim modeli gözləniləndən daha qalın ola bilər. “Naver” internet portalında blogger yeux1122 yazır ki, “Apple” iPhone 17 Slim-də daha incə substratlı batareya istehsalındakı çətinliklər və yüksək istehsal xərcləri səbəbindən istədiyi incə səviyyəyə çata bilməyəcək. Qeyd edək ki, nazik ana plataların kütləvi istehsalında tədarük çatışmazlığının olduğu da bildirilir. Əvvəlcə 7 mm-dən az nazikliyə sahib olacağı qeyd edilən və iPhone 6-dan sonra ən nazik iPhone modeli olacağı gözlənilən smartfonun qalınlığı əslində daha çox ola bilər.
Bununla belə, iPhone 17 Slim modelinin ekran, performans və kamerada əhəmiyyətli təkmilləşdirmələr təklif edəcəyi gözlənilir. 120 Hz yeniləmə tezliyi ilə ProMotion texnologiyası, təkmilləşdirilmiş 48 MP kamera sensoru və ön kameranın 12 MP-dən 24 MP-ə yüksəldilməsi kimi təkmilləşdirmələr planlaşdırılan yeniliklər arasındadır. Hazırda Apple bu problemlər ilə üzləşən yeganə şirkət deyil. Bildirilir ki, Samsung 2025-ci ilin əvvəlində təqdim etməyi planlaşdırdığı Galaxy S25 Slim ilə də oxşar problemlər yaşayır. Lakin Samsung-un bu problemin həlli olaraq batareya üçün yeni materiallardan istifadə etməkdə irəliləyiş əldə etdiyi bildirilir. Texnologiya nəhəngi problemi həll edə bilsə də, materialların sayı məhdud olduğundan Slim modelini məhdud sayda çıxara bilər.
