Tarixdə ilk dəfə olaraq ağacdan hazırlanmış Taxta Peyk kosmosa buraxılıb. Xatırladaq ki, daha əvvəl alimlərin Taxta Peyk hazırladığı barədə xəbər vermişdik. Peykin məqsədi taxtanın kosmosa uyğun olub olmadığını anlamaqdır.
Ümumiyyətlə, Ağacın bəşər tarixi boyu uzun məsafələri araşdırmaqda xüsusi rolu olub. Təbii ki, ağaclardan gəmilər, at arabaları, təkərlər və sairə hazırlanaraq uzun məsafələr qət edilib. İndi isə Alimlər kosmosa taxta peyk buraxıblar və ağacın kosmos şəraitinə kifayət qədər davamlı olub-olmadığını anlamaq istəyirlər. LignoSat adlı taxta peyk Beynəlxalq Kosmik Stansiyaya göndərilən SpaceX missiyası zamanı kosmosa buraxılıb. Planetimizdən təqribən 400 kilometr yüksəklikdə orbitə çıxacaq peyk, kosmos şəraitinin ağaca təsirini müəyyən etmək üçün altı ay ərzində müşahidə ediləcək. Peykdə olan cihazlar müşahidə tədqiqatları üçün istifadə olunacaq.
Kyoto Universitetinin tədqiqatçıları və ağac şirkəti Sumitomo Forestry tərəfindən 2020-ci ildə start verilən layihədə onlar “kosmik ağac” yaratmaq üzərində işləmək üçün bir araya gəliblər. Belə ki, 2022-ci ildə hazırlanmış ilk ağac nümunələri Beynəlxalq Kosmik Stansiyada 240 gün sınaqdan keçirilmişdi. Qeyd edək ki, araşdırmada Hoonoki adlı bir maqnoliya ağacı növündən istifadə edilmişdir. Kyoto Universitetindən professor və astronavt Takao Doi, bildirmişdi ki, “Biz özümüzün istehsal edə biləcəyimiz bir material olan ağacdan evlər tikə və əbədi olaraq kosmosda yaşaya və işləyə bilərik”. Doi, ağacın yararlılığını sübut etdikdə SpaceX-ə təklif göndərməyi hədəflədiklərini bildirib.
