Proqram təminatı nəhəngi Microsoft, 2025-ci ilin oktyabrında başa çatacaq Windows 10-dan daha bir il etibarlı şəkildə istifadə etməyə davam etməyin qiymətini 30 dollar olaraq təyin edib. Beləliklə, Microsoft şirkəti 30 dollar ödəniş müqabilində istifadəçilərə Windows 10 üçün əlavə bir illik dəstək təmin edəcək.
Xatırladaq ki, Windows 10 əməliyyat sisteminin dəstəyi 14 oktyabr 2025-ci ildə başa çatacaq. Microsoft istifadəçilərə Windows 11 sisteminə keçid etməyi tövsiyə edir, lakin köhnə əməliyyat sistemindən hələ də imtina etmək istəməyən istifadəçilər Genişləndirilmiş Təhlükəsizlik Yenilənməsi (ESU) üçün illik abunəlik əldə edə biləcəklər. ESU proqramına qeydiyyat gələn ilin payızında mümkün olacaq və istifadəçilər 30 dollar ödəməklə Windows 10 üçün vacib təhlükəsizlik yeniləmələrini daha bir il də almağa davam edə biləcəklər.
Bununla belə, yeni funksiyalar, xətaların düzəldilməsi və Microsoft texniki dəstəyi artıq mövcud olmayacaq. Müəssisə müştəriləri də Windows 10 dəstəyini əlavə olaraq artıra biləcəklər. Lakin bu zaman müddət və məbləğlər tamamilə fərqli olacaq. Belə ki, ESU-nun birinci ili şirkətlərə 61 dollara, ikinci il 122 dollara, üçüncü il üçün isə 244 dollara başa gələcək. Beləliklə, Windows 10 sistemindən rahatlıqla imtina edə bilməyən istifadəçilər hələ əlavə bir il yenilənmə dəstəyi ala biləcəklər.
