Beləliklə, Xiaomi brendinin maraqla gözlənilən Xiaomi 15 seriyası rəsmi olaraq 29 Oktyabr tarixində Çində təqdim ediləcək. Bununla belə, Xiaomi 15 seriyası hələ təqdim edilməsə də onun dizaynı və hətta render görüntüləri ortaya çıxıb.
Xiaomi, ilin sonuna yaxınlaşdıqca yeni flaqman seriyası üçün hazırlıqlarını davam etdirir. Texnologiya nəhəngi, Xiaomi 15 və 15 Pro modellərini oktyabrın sonunda, Xiaomi 15 Ultra modelini isə gələn il təqdim edəcək. Bununla belə, şirkət indi rəsmi olaraq Xiaomi 15 seriyasının görüntülərini paylaşıb. Weibo platformasında Xiaomi şikətinin rəsmi səhifəsində paylaşılan Xiaomi 15 və Xiaomi 15 Pro görüntüləri smartfonun dizaynını da məlum edib. İlk öncə qeyd edək ki, Xiaomi 15, Çində vivo X200 Pro mini ilə rəqabət aparmaq üçün 6,36 düymlük ekrana sahib olacaq. Həmçinin ultrasəs barmaq izi sensoruna sahib olan cihaz 50% daha yaxşı performansa sahib olacaq. 90 Vt naqilli, 80 Vt naqilsiz şarj dəstəkləyən 5500 mAs batareya həcminə sahib olan bu cihaz 29 Oktyabrda rəsmi olaraq təqdim ediləcək.
Xiaomi 15 seriyasının yeni Pro modeli isə “daha güclü və daha incə” olaraq təsvir edilir. 213 qram ağırlığında və cəmi 8,35 mm qalınlığında olan Xiaomi 15 Pro heyrətamiz 2K təsvir ölçüsünə 120 Hz yeniləmə sürətinə 6,78 düymlük AMOLED ekrana sahib olacaq. Bundan əlavə, cihaz 90 Vt naqilli, 80 Vt naqilsiz şarj dəstəkli 6000 mAs batareya həcminə sahib olacaq. Həmçinin yeni cihazın f/1.4 50 MP Light Fusion 900 seriyalı əsas, 50 MP ultra geniş, 50 MP Sony IMX858 5X telefoto kamera sensorları ilə təchiz edilməsi gözlənilir
Daha əvvəl Xiaomi 15 Ultra-nın texniki xüsusiyyətləri haqqında bir neçə iddia ortaya çıxmışdı. Nəhayət, Xiaomi 15 Ultra-nın yeni görüntüləri ortaya çıxıb. Sızdırılan görüntülərə görə, Xiaomi 15 Ultra varisi olduğu Xiaomi 14 Ultra-nın dizaynına böyük ölçüdə sadiq qalacaq. Amma xüsusilə də kamera linzalarının düzülüşü baxımından böyük fərq var. Kamera çərçivəsi Ultra seriyasındakı kimi dairəvi olsa da, ada daxilində kameraların yerləşdirilməsi gördüyünüz kimi tamamilə asimmetrikdir.
Smartfonun ön panelində videozənglər və selfilər üçün perforasiya edilmiş ekran var. Belə ki, smartfon həm də rəqiblərindən daha incə ekran çərçivələrinə sahib olacaq. Xiaomi 15 Ultra-nın Vivo X100 Ultra ilə eyni Samsung ISOCELL HP9 sensoruna sahib olacağı gözlənilir. Smartfonun sələfindən fərqli olaraq 200MP periskop telefoto modulu ilə müşayiət olunacağı bildirilir. Digər sensorlarda heç bir dəyişiklik gözlənilmir. Əvvəlki məlumatlara görə, Xiaomi 15 Ultra-nın Snapdragon 8 Gen 4 və ya Snapdragon 8 Elite ilə təchiz ediləcəyi bildirilmişdi. Bu konfiqurasiyaya 24 GB-a qədər RAM və nəhəng 6200 mAh batareya həcmi daxildir. Smartfonun Android 15 əsasında ən son HyperOS 2.0 ilə təqdim ediləcəyi ehtimal edilir. Ekran isə 2K təsvir ölçüsünə və 144Hz yeniləmə tezliyinə sahib OLED panel ilə təchiz ediləcək.
