Bidiyimiz kimi, bu yaxınlarda Microsoft OpenAI-a 13 milyard dollar sərmayə qoymuşdu. Hətta Microsoft şirkətinin baş direktoru Satya Nadella daha əvvəllər də startapa “pul tökərək” sıx əməkdaşlıq edirdi. Bununla belə, “New York Times” dörd anonim mənbəyə istinadən xəbər verir ki, OpenAI-nin direktorlar şurası keçən noyabrda Sam Altmanı baş direktor vəzifəsindən qısa müddətə azad etdikdən sonra Nadella və Microsoft münasibətlərini yenidən qiymətləndiriblər. Beləliklə, iddialara görə Microsoft və OpenAI əməkdaşlığı yaxın tarixlərdə rəsmi olaraq sona çata bilər.
Altmanın işdən çıxarılmasından sonrakı aylarda, OpenAI bu il 5 milyard dollardan çox xərcləsə də, Microsoft tərəfdaşına heç bir maliyyə dəstəyi verməmişdi. Qeyd edək ki, OpenAI-nin süni intellekt sistemlərini öyrətmək və idarə etmək üçün əlavə vəsaitə və hesablama resurslarına ehtiyacı var. Altman bir vaxtlar OpenAI və Microsoft-un tərəfdaşlığını “texnoloji sənayedəki ən güclü dostluq” adlandırırdı, lakin indi şirkətlər arasında əlaqələr pozulmağa başlayır. Münasibətlərin möhkəmlənməsinə maneələr arasında OpenAI-nin maliyyə problemləri, şirkətin sabitliyinə dair şübhələr və işçiləri ilə Microsoft-dakı fikir ayrılıqları yer alır.
Bu vəziyyət, süni intellektlə işləyən startaplar üçün tipik problem yaradır: pul və hesablama resurslarına görə dünyanın texnoloji nəhənglərindən asılılıq. Bunun əsas səbəbi isə böyük şirkətlərin kiçik startapların süni intellekt inkişaf etdirməsi üçün lazım olan kütləvi bulud hesablama infrastrukturlarına nəzarət etməsidir. Microsoft və OpenAI əməkdaşlığı da bu əlaqəni çox aydın şəkildə nümayiş etdirirdi. OpenAI Microsoft-dan böyük sərmayə alanda, şirkətdən hesablama resursları almaq və yeni süni intellekt sistemlərini inkişaf etdirmək üçün sıx əməkdaşlıq etmək üçün razılaşmışdı. Keçən il ərzində OpenAI hesablama gücünü artırmaq və xərcləri azaltmaq üçün sövdələşməni yenidən müzakirə etməyə çalışır, Microsoft rəhbərləri isə şirkətin əməliyyatlarının OpenAI-dən həddən artıq asılı olmasından narahatdırlar.
