Bildiyimiz kimi, ötən aylarda Çinin qabaqcıl avtomobil nəhənglərindən olan BYD Azərbaycanda yeni istehsal müəssisəsi açmaq üçün Azərbaycan ilə əməkdaşlığa başlamışdı. Bağlanılan müqaviləyə əsasən şirkət, ilkin mərhələdə ölkəmizdə yerli istehsalın qurulması və ehtiyat hissələrinin mərhələli şəkildə lokallaşdırılmasını həyata keçirəcəkdi. Habelə, şirkət 2026-cı ildən aşağı tonnajlı yük elektrik avtomobillərinin və elektrik mühərrikli avtonəqliyyat vasitələrinin istehsalını planlaşdırmışdı. Lakin, son açıqlama onu göstərir ki, bütün bunlar gözləniləndən daha tez baş verə bilər.
Təhsilin İnkişafı Forumunda iqtisadiyyat nazirinin birinci müavini Elnur Əliyev bildirib ki, BYD artıq gələn ildən Azərbaycanda istehsal müəssisəsi quracaq və burada minik avtomobilləri istehsal olunacaq. Qeyd edək ki, daha əvvəl bu prosesin 2026-cı ildən sonra baş tutması gözlənilirdi. Həmçinin, müqaviləyə əsasən Çinli nəhəng 2028-ci ildən elektrik enerjisinin saxlanması üçün batareyaların yığımı kimi sahələrdə əməkdaşlıq etməyə başlayacaqdı. Bütün bu layihələr üzrə yaradılacaq birgə müəssisə tərəfindən ümumilikdə təqribən 60 milyon ABŞ dolları məbləğində əlavə investisiyanın qoyulması planlaşdırılmışdı.
Xatırladaq ki, bağlanmış müqaviləyə əsasən 31 oktyabr 2024-cü il tarixinədək “BakuBus” MMC tərəfindən BYD şirkətindən 160 ədəd elektrik mühərrikli avtobus və 100 ədəd enerjidoldurma aparatı alınacaqdı. Hazırda isə bu mərhələ davam etdirilir. Ölkəmizdə elektrik avtobuslarının istehsalı layihəsində “Azərbaycan İnvestisiya Şirkəti” ASC payçı kimi iştirak edir və Layihə üzrə BYD şirkətinin Azərbaycandan olan tərəfdaşı “SARDA Group” şirkətlərinə məxsus “Electrify Azerbaijan” MMC-dir.
Çinin BYD şirkəti tərəfindən Sumqayıt Kimya Sənaye Parkında qurulacaq zavodda elektrik mühərrikli avtobusların istehsalına yaradılacaq birgə müəssisə tərəfindən təqribən 34 mln. ABŞ dolları həcmində investisiyanın qoyulması nəzərdə tutulub. Şirkət tərəfindən daxili tələbat və ixrac imkanları nəzərə alınmaqla illik istehsal gücünün 500 ədəd olması nəzərdə tutulur. Layihə çərçivəsində 800 yeni iş yerinin yaradılması planlaşdırılır.
Məlumat üçün qeyd edək ki, 1995-ci ildə yaranmış BYD şirkəti 2023-cü ildə 3 milyon yeni enerji avtomobilinin rekord satışını həyata keçirməklə dünya birincisi olub və şirkət avtomobil istehsalı, elektronika, elektrik batareyaları, bərpa olunan enerji və dəmir yolu nəqliyyatı sahələrində son yenilikləri tətbiq edən dünyamiqyaslı aparıcı texnologiya şirkətlərindən biri hesab olunur.
