Beləliklə, ötən ilin 3-cü rübü ilə müqayisədə qlobal bazarda kompüter satış rəqəmləri əhəmiyyətli səviyyədə azalıb. Habelə, Apple şirkətinin satış rəqəmləri də kəskin şəkildə aşağı düşüb.
Qlobal kompüter tədarükü 2024-cü ilin üçüncü rübündə keçən ilin eyni dövrü ilə müqayisədə bir qədər azalıb. Qlobal fərdi kompüter tədarüklərinin növbəti illərdə süni intellektlə işləyən kompüterlər hesabına əhəmiyyətli dərəcədə artacağı gözlənilir, lakin hələlik satışlar sabit olaraq qalır. Beynəlxalq Data Korporasiyası (IDC) 2024-cü ilin üçüncü rübündə dünya üzrə ümumi kompüter tədarükü ilə bağlı ən son statistikanı açıqlayıb. Ümumi kompüter tədarükləri keçən il 70,5 milyon satışdan bu ilin üçüncü rübündə 68,8 milyon ədədə qədər azalıb.
Siyahıda Lenovo, HP və Dell ilk üç mövqelərini qoruduğu halda, keçən il dördüncü yerdə olan Apple öz yerini Asus-a itirib. Apple-ın satışları 24,2% azalaraq 7 milyondan 5,3 milyona düşüb. Asus 10% artımla 5,5 milyon satışa nail olub. Qeyd edək ki, ilin əvvəlindən süni intellektlə dəstəklənən kompüter satışları iki dəfə artıb. Microsoft Copilot+ AI noutbuklarının tədarükünün qarşıdakı illərdə eksponent olaraq artacağı gözlənilir. Mütəxəssislər, süni intellektlə işləyən kompüterlərin və Apple-ın M4 əsaslı Mac-lərinin yaxın aylarda premium seqmenti canlandıracağını gözləyirlər.
