Sierra Space, NASA-nın Johnson Kosmik Mərkəzində Ay torpağından ilk avtomatlaşdırılmış oksigen çıxarılmasını həyata keçirib. Bu tarixi inkişaf Ayda qurulacaq yaşayış yerləri üçün böyük əhəmiyyət kəsb edir.
Kosmik sənayenin aparıcı adlarından biri olan Sierra Space, Ayda davamlı insan varlığı yaratmaq üçün inkişaf etdirdiyi inqilabi texnologiyanı açıqlayıb. Şirkət, Ay torpağından oksigen çıxarmaq üçün öz dizaynı olan Karbotermal Oksigen İstehsalı Reaktorunun NASA-nın Johnson Kosmik Mərkəzində termal vakuum sınaqlarını uğurla tamamladığını açıqlayıb. Belə ki, bu texnologiya avtomatik və müstəqil sistemlə simulyasiya edilmiş Ay torpağından oksigen əldə etməyə imkan verərək tarix yazıb. Bu yenilik, NASA-nın Artemida proqramının əsas məqsədlərindən biri olan insanların Ayda uzunmüddətli mövcudluğunu dəstəkləmək üçün oksigenin kütləvi istehsalını hədəfləyir.
Sierra Space-in baş direktoru Tom Vice vurğulayıb ki, bu inkişaf Apollon proqramından fərqli olaraq missiyaya Ayda daimi varlıq yaratmağa imkan verəcək. Onun sözlərinə görə “Apollon proqramı bizi Aya apardı, Artemis bizi orada saxlayacaq”. Avqust ayında keçirilən sınaqlarda Sierra Space oksigen çıxarma sistemləri iki həftə ərzində Johnson Kosmik Mərkəzindəki termal vakuum kamerasında simulyasiya edilmiş Ay torpağında oksigen çıxarmaq üçün işə qoyulib. Ayın su buzları ilə örtülmüş cənub qütb bölgəsinə bənzər şəraitdə aparılan sınaqlar, karbotermal reduksiya reaksiyası sayəsində reqolitdən oksigeni müvəffəqiyyətlə çıxarıb. Sierra Space-in obyektlərində hazırlanmış bu sistem Ayda uzunmüddətli insanların məskunlaşması və gələcək kosmos tədqiqi üçün mühüm addım kimi qiymətləndirilir. Şirkətin kosmik infrastruktur komandası kosmosda genişləndirilə bilən modullar və qida istehsalı sistemləri kimi qabaqcıl texnologiyalar üzərində işləyərək bu infrastrukturu Ayda istifadəyə yararlı hala gətirməyi hədəfləyir.
