Cənubi Koreya mərkəzli Samsung brendinin son bir neçə ildə yüksək səviyyəli ağıllı smartfonlarından üstünlük verdiyi batareya həcmi tənqid olunur. Görünən odur ki, eyni tənqidlər məhz batareya səbəbindən yeni təqdim ediləcək Samsung Galaxy S25 Ultra modeli ilə də davam edəcək.
Təxminən 5 ay sonra yeni flaqman smartfon seriyasını təqdim etməyə hazırlaşan Samsung brendi Galaxy S25 üçün son hazırlıqlarını tamamlayır. Smartfonun təqdim edilməsinə hələ aylar qalsa da onun barəsində yeni məlumatlar və yeni iddialar internetə sızdırılmağa davam edir. Xüsusi olaraq, Galaxy S25 Ultra modelinin bəzi dizayn məlumatları paylaşıldıqdan sonra, onun yeni batareya həcmi barədə də ilkin məlumatlar ortaya çıxıb. Beləliklə, S25 Ultra batareya tərəfində bizləri məyus edə bilər.
China Compulsive Certification (CCC) verilənlər bazasındakı son məlumata görə, Galaxy S25 Ultra-nın batareya həcmi sadəcə 4885 mAs təşkil edəcək. Bu, Galaxy S24 Ultra-nın nominal batareya tutumuna tamamilə bənzərdir. Analitiklərə görə isə yeni flaqman smartfon 5000 mAs batareya həcmi ilə qarşımıza çıxacaq. Əvvəlki hesabatda da iddia edilmişdi ki, Samsung növbəti flaqman smartfonunda şarj sürətini artırmayacaq. Bu isə batareya tərəfində digər məyusedici xəbər hesab oluna bilər. Honor, OnePlus və Xiaomi kimi Çinli rəqiblər indi 6000 mAh səviyyəyə çatmaqla daha yüksək enerji sıxlığı təklif edən Silicon Carbide batareya texnologiyasına keçirlər. Samsung isə Çinli rəqiblərini keçmək niyyətində deyil.
