CIRP 2024-cü ildə ən çox satılan iPad modellərini göstərən hesabatdan sonra Apple Watch satışları ilə bağlı yeni hesabat dərc edib. Belə ki, yeni paylaşılan hesabata görə bu ilin ən çox satılan Apple Watch modeli şirkətin flaqman Watch 9 modelidir.
Maraqlısı budur ki, iPhone və iPad modelləri arasında ən çox Pro versiyaları populyarlıq qazansa da, Apple Watch modellərində bu vəziyyət biraz daha fərqlidir. CIRP Amerikada ən populyar Apple Watch modellərini göstərən yeni hesabat dərc edib. Ən populyar Apple Watch modeli isə nə daha böyük ekranlı və dayanıqlı Watch Ultra 2, nə də ən sərfəli Watch SE 2 modelləri deyil. Beləliklə, bu ilin ən çox satılan Apple Watch modeli Watch 9 olub.
CIRP-nin araşdırmasına görə, Apple Watch Series 9 ABŞ-da ümumi saat satışlarının 43%-ni təşkil edir. Ən yeni modellər ən çox satışa sahib olsa da, köhnə modellər hələ də bazarda mühüm yer tutur. Belə ki, Series 8 artıq birbaşa Apple tərəfindən satılmasa da, müxtəlif pərakəndə satışlar vasitəsilə satılır və satışın 19%-ni təşkil edir. Cari və əvvəlki yüksək səviyyəli modellər birlikdə bu müddət ərzində bütün Apple Watch satışlarının təxminən üçdə ikisini təşkil edir. Qrafikə baxdıqda, Apple Watch Ultra seriyasının bazar payının 20%-nə çatdığını görmək olar. iPhone və iPad Pro modellərinin satışların dörddə birini və ya daha çox hissəsini təşkil etdiyini nəzərə alsaq, bu, aşağı faizdir.
