Redmi və Poco kimi alt markalara da sahib olan Xiaomi, bir çox smartfon modeli üçün proqram təminatının dayandırıldığını açıqlayıb. Bu qərardan təsirlənən smartfon modelləri isə bir zamanlar orta səviyyəli smartfon bazarından olduqca böyük marağa səbəb olmuşdu.
Belə ki, Çin texnologiya nəhəngi Xiaomi, Redmi və Poco brendləri altında bir çox smartfonlar üçün proqram təminatı dəstəyini dayandırmaq qərarına gəlib. Bu qərarla Xiaomi Mi 10 seriyası və Redmi Note 10 seriyası kimi modellər artıq müntəzəm proqram yeniləmələri almayacaq. Dəstəklənməyən Xiaomi cihazlarına Xiaomi Mi 10S, Mi 10 Pro, Mi 10, Mi 10 Ultra və Mi 11 Lite 5G kimi modellər daxildir. Bu modellər Çin, Avropa və digər regionlarda satılan versiyaları ilə birlikdə yenilənmə almayacaqlar.
Redmi istifadəçiləri üçün də vəziyyət oxşardır. Orta seqmentdə məşhur olan Redmi Note 10 seriyası artıq proqram dəstəyi almayacaq. Bu qərardan təsirlənən modellərə Redmi Note 10 Pro, Redmi Note 10, Redmi Note 10 5G, Redmi Note 10T və Redmi Note 8 (2021) daxildir. Bundan əlavə, Poco markası altında olan bir model də bu qərardan təsirlənib. Poco M3 Pro 5G proqram təminatına dəstəyi dayandırılmış cihazlar arasında yer alıb. Qeyd edək ki, yeni qərar ilə siyahıda olan cihazlar artıq proqram yenilənmələrini almayacaq. Məhz belə bir vəziyyət istifadəçilərin potensial təhlükəsizlik zəiflikləri və yeni problemlər ilə üzləşməsinə gətirib çıxara bilər.
