Apple şirkəti tərtibatçılar üçün iOS 18.1, iPadOS 18.1 və macOS Sequoia 15.1-in ilk beta versiyasını istifadəyə verib. Beləliklə, uzun müddətdir ki, gözlənilən Apple Intelligence xüsusiyyətləri də yeni iOS 18.1 beta versiyası ilə sınaqdan keçiriləcək.
Apple ötən gün yeni əməliyyat sisteminin ilk beta versiyasını tərtibatçılar və istifadəçilər üçün açıq elan edib. Qeyd edək ki, bu yenilənmə Apple Intelligence xüsusiyyətlərini iOS 18.1 beta versiyasına sahib olan iPhone 15 Pro və iPhone 15 Pro Max modellərinə gətirir. Ümumiyyətlə, süni intellekt xüsusiyyətləri üzərində uzun müddətdir işləyən Apple ötən gün tərtibatçılara böyük imkan verib ki, öz proqramlarını Apple Intelligence ilə uyğunlaşdırsınlar.
Smartfonlarını iOS 18.1-ə yeniləndikdən sonra istifadəçilər Parametrlərdən Apple Intelligence-i aktiv etməlidirlər. Bununla belə, ilk növbədə gözləmə siyahısına qoşulmaq tələbi mövcuddur. Apple süni intellekt funksiyaları mövcud olduqda bildirişlər göndərəcəyini bildirir. Həmçinin, Apple Intelligence üçün iPhone ingilis dilinə, region isə Amerikaya uyğunlaşdırılmalıdır. Bu gündən etibarən iPhone 15 Pro və Pro Max sahibləri Yazı alətləri, Siri-nin yeni dizaynı, bildirişlərin xülasəsi, yeni Poçt kateqoriyalarını və digər Apple Intelligence yeniliklərini istifadə edə biləcəklər. Lakin, Image Playground, Genmoji, prioritet bildirişlər və ChatGPT inteqrasiyası kimi digər funksiyalar iOS 18.1 beta 1-də mövcud olmayacaq.
