Yeni nəsil Nokia telefonlarını istehsal edən HMD ilə dünyaca məşhur pivə nəhəngi Heineken maraqlı əməkdaşlığa imza atıb. Beləliklə, öz sahələrindəki nəhənglər arasında yer alan Heineken və Nokia yeni Boring Phone adlı telefon hazırlayıb. Qeyd edək ki, HMD tərəfindən istehsal edilən telefon sadəcə 5000 ədəd istehal sayı ilə məhdudlaşır. Hətta bu telefonların əksəriyyəti hədiyyə olaraq veriləcək. Boring Phone əslində diqqəti yayındıran üçüncü tərəf proqramları və ya internetə çıxışı olmayan mümkün qədər sadə bir cihaz olaraq hazırlanıb.
Heineken və Nokia əməkdaşlığı altında istehsal edilən Boring Phone, şəffaf korpusa və xüsusi monoxrom dizayna sahibdir. O cümlədən bu telefonun Nokia 2660 Flip-ə əsaslandığını qeyd edə bilərik. 2.8 düymlük QVGA təsvir ölçülü əsas ekrana və 1.77 düymlük xarici ekrana sahib olan cihaz arxa tərəfində LED flaşı olan 0.3MP kameraya sahib olub. Bundan əlavə, proqram tərəfində telefon Mocor RTOS-a əsaslanır. Cihazda həmçinin pərəstişkarların sevimli Snake oyunu, FM radio və qulaqlıq yuvası var.
2G, 3G və 4G şəbəkələrinə qoşularaq telefon danışıqları etməyə və SMS göndərməyə imkan verən bu cihaz əslində adından da göründüyü kimi darıxdırıcıdır. İki sim yuvası və microSD kart yuvasına sahib olan telefon həmçinin 128 MB daxili yaddaşa malikdir. O cümlədən batareya tərəfində çıxarıla bilən 1450 mAh batareya ilə təchiz edilən telefon 3G/4G şəbəkələrində bir həftəyə qədər gözləmə rejimi və 6 saata qədər danışıq müddəti vəd edir.
