Ötən günlərdə İranın PUA və raketlərlə İsrailə hücumu 11 sentyabr 2001-ci ildə Dünya Ticarət Mərkəzinə hücumdan sonra aviasiya tarixinin ən böyük böhranına səbəb olub. Belə ki, İranın İsrailə raket və pilotsuz uçuş aparatlarından istifadə edərək hücum etməsi Avropa və Asiya arasında uçan təyyarələrin seçim imkanlarını daha da daraldıb və uçuşlarda fasilələrə səbəb olub. Hətta, son iki gündə ən azı onlarla aviaşirkət, o cümlədən Türk Hava Yolları, Pegasus, Ajet, Qantas, Lufthansa, United Airlines və Air India kimi reyslərini ləğv etmək və ya marşrutunu dəyişmək məcburiyyətində qalıb.
Hava məkanına və hava limanlarına nəzarət edən OPSGROUP-un təsisçisi Mark Zeenin sözlərinə görə, İranın İsrailə hücumu 2001-ci il sentyabrın 11-də Dünya Ticarət Mərkəzinə hücumdan sonra aviasiya tarixinin ən böyük bohranına səbəb olub. Mark Zee açıqlamasında, fasilələrin bir neçə gün daha davam edə biləcəyini ifadə edərək, “O vaxtdan bəri, bu qədər müxtəlif hava məkanının bu qədər sürətlə bağlandığı vəziyyətlə qarşılaşmamışıq” deyib.
Son marşrut problemləri İsrail və HƏMAS, Rusiya və Ukrayna arasında münaqişələr səbəbindən onsuzda məhdudiyyətlərlə üzləşən aviasiya sənayesini olduqca çətin vəziyyətə salıb. Zee həmçinin bildirir ki, aviaşirkətlər Yaxın Şərq üçün yeni marşrutlar yaratmalı olacaqlar. Aviaşirkətlər marşrutlarını iki alternativ marşrutla əvəz edə biləcək. Bunlardan biri Türkiyə digəri isə Misir və Səudiyyə Ərəbistanı üzərindən keçir.
