Ötən il bütün medianı zəbt edən RTX 4090 qrafik kartlarında ortaya çıxan kabel problemi bir müddət sonra yaddan çıxsa da, qrafik kartlar hələ də işləyərkən yanmağa davam edir. Belə ki, ABŞ mərkəzli NorthridgeFix servis mərkəzində işləyən bir əməkdaş bir ay ərzində 200 belə problemin ortaya çıxdığını iddia edib. Xatırladaq ki, Nvidia şirkəti ötən ötən ilin sonlarına yaxın RTX 4090 qrafik kartının çox qızması səbəbindən elektrik kabellərinin əriməsi probleminə görə məhkəməyə də verilmişdi. Nvidia isə daha sonra bu kabellərin qaydalara uyğun olmadan taxıldığını iddia edərək işin içindən “sıyrılmışdı”.
Amerikalı NorthridgeFix əməkdaşı son bir ayda daha 200 RTX 4090 qrafik kartında konnektor probleminin yaşandığını sübut etmək üçün xarab olmuş konnektorlardan ibarət qutunu da sosial şəbəkədə paylaşıb. Ümumiyyətlə, Nvidia şirkəti sosial şəbəkəni zəbt edən bu problemlərdən sonra 12VHPWR konnektorunu daha təhlükəsiz 12V-6X2 ilə əvəz etmişdi. Hətta bundan sonra CableMod “yanğın təhlükəsizliyinə sahib” yenilənmiş 12VHPWR V1.1 konnektorlarını təqdim etsə də, eyni problemlər təkrarlandığı üçün geri çağırmışdı. NorthridgeFix sözçüsü baş verənlərə görə ilk növbədə istifadəçiləri və ya kabel istehsalçılarını deyil, konnektorun özünü məsul hesab edir.
Hələlik, bu məlumat dəqiqləşdirilmədiyi üçün isə Nvidia şirkəti də bu problemə münasibət bildirməyib. Lakin sosial şəbəkələrdə yenidən bir çox insanın belə probemlə yenidən üzləşməsi bir daha onu göstərir ki, Nvidia problemi kökündən həll etməyib. Onu da qeyd edək ki, əsasən problemin hansı standart konnektorda olduğu ortaya çıxmayıb.
