Apple, istifadəçiləri köhnə iPhone modellərini ən yeniləri ilə əvəz etməyə təşviq etmək üçün rəsmi saytında yeni səhifə yaradıb. Belə ki, bu səhifədə ABŞ mərkəzli Apple şirkəti yeni iPhone modellərinin köhnə iPhone modellərinə nisbətən üstünlüklərini izah etməyə başlayıb. Şirkət, özünəməxsus smartfonların fərqli modellərini aydın şəkildə müqayisə edir və yenilərinin hansı üstünlüklərə sahib olduğunu göstərir.
Apple şirkətinin yeni səhifəsi istifadəçilərə iPhone 11, iPhone 11 Pro, iPhone 11 Pro Max, iPhone 12, iPhone 12 mini, iPhone 12 Pro və iPhone 12 Pro Max modellərini yeni iPhone 15, iPhone 15 Plus, iPhone 15 Pro və iPhone 15 Pro Max modelləri ilə ətraflı müqayisə etməyə imkan verir və üstünlüklərini sadalayır. Hər bir müqayisə qutusu yeni cihazların alınması zamanı istifadəçilərin əldə edəcəyi faydaları nümayiş etdirir. Məsələn, iPhone 11 ilə müqayisədə yeni iPhone 15 dörd dəfə daha yaxşı şəkil ayırdetmə qabiliyyəti, daha çox yaddaş, video çəkiliş üçün Fəaliyyət və Kinematik rejim dəstəyi, 60 faiz daha sürətli GPU, 5G dəstəyi və sairə təklif edir.
Apple-ın saytındakı yeni səhifədə həmçinin cihazların ekran texnologiyaları, dizaynı, ölçüsü kimi mövzülarda müqayisəsi də mövcuddur. Bundan əlavə şirkət, müştərilərin köhnə smartfonlarını təhvil verib yenisini əldə etdikdə əldə edə biləcəkləri endirimi başa düşmələri üçün öz ticarət proqramı haqqında da ətraflı məlumat verir. Apple həmçinin aylıq Apple Card taksitlərini reklam edir və yeni iPhone 15-in alış qiymətini 0 dollara endirə biləcək operator təkliflərini qeyd edir. Ümumiyyətlə, ABŞ-da smartfon bazarı hazırda “həddindən artıq doyub”, ona görə də Apple üçün yeni müştərilər tapmaq getdikcə çətinləşir.
