Uzun müddətdir ki, gündəmdə olan Playstation 5 Pro modelinin xüsusiyyətləri sızdırılmış ola bilər. Xatırladaq ki, şirkət ötən aylarda Playstation 5 Slim modelini bazara çıxarmışdı. İndi isə daha yeni və daha güclü olduğu iddia edilən Pro modeli barədə təfərrüatlar ortaya çıxıb. Belə ki, Playstation 5 Pro, daha yüksək tezlik ilə hazırkı PS5 modelində istifadə edilən Zen2 arxitekturasını saxlayacaq. Ümumiyyətlə Sony şirkətinin Playstation 5 modelini təqdim etməsindən artıq 3 il keçib. 3 ildən sonra Slim modeli çıxan Playstation 5-in indi Pro versiyası da yoldadır.
Paylaşılan məlumatlara görə Playstation 5 Pro xüsusiyyətləri arasında 4.4 GHz tezlik, 16GB GDDR6 operativ yaddaş, 64KB L1, 512KB L2 və 8MB L3 yaddaş texnologiyaları aiddir. Habelə cihaz GPU tərəfində RDNA3 əldə edəcək. Hətta Sony cihaza XDNA2 NPU da əlavə edib. Digər modəllərlə müqayisə etsək Playstation 5 Pro modeli 28.67 TFLOPS performansa sahib ola biləcək. Qeyd edək ki, bu göstərici Playstation 5 modelində 10,28 TFLOPS və Xbox Series X-də 12 TFLOPS təşkil edir. Məhz burdan yeni oyun konsolunun hansı gücdə olacağını təxmin etmək çətin deyil. Project Trinity kod adlı konsol RDNA4 əsaslı şüa izləmə təkmilləşdirmələrinə və 576 GB/s yaddaş ötürmə genişliyinə sahib olacaq.
Hətta yeni oyun konsolunun gələn ilin sentyabr ayında elan ediləcəyi, noyabr ayından isə artıq satışa çıxarılacağı ortaya çıxıb. Bundan əlavə bu xüsusiyyətlər oyun sənayesinin tanınmış adlarından biri olan Tom Henderson-dan da soruşulub. Henderson bildirib ki, “Sony, tərtibatçı dəstləri studiyalara göndərildiyi üçün bu ay bütün xüsusiyyətlərin sızmasını gözləyir”. Təbii ki, ortaya çıxan məlumatların heçbiri hələ rəsmi təsdiqini tapmayıb. Hətta heç Playstation 5 Pro ilə bağlı Sony daha əvvəl də açıqlama etməyib. Ancaq yenə də konsolun ilkin versiyanın 3 il əvvəl təqdim edildiyini nəzərə alsaq yeni və daha təkmillləşmiş versiyasının yolda olduğunu deyə bilərik.
