Tesla ötən günlərdə Cybertruck modelini rəsmi olaraq təqdim etmişdi. Lakin bu təqdimat heç də həvəskarların ürəyincə olmadı. Belə ki, elektromobilin istehsal müddətinin çox uzun olması sifarişlərin çatdırılmasında problem yaşadacaq. Habelə indi Tesla Cybertruck modelinin kəskin dizaynı və polad gövdəsi təhlükəsizlik mütəxəssislərini narahat edir. Yəqin ki, bu elektromobilin dizaynı hərkəsin diqqətini çəkib. Hətta ağıllara gələn ilk sual da bu mükəmməl dözümlü elektromobilin qəza anında qarşıdakı maşını və ya piyadanı hansı vəziyyətə gətirəcəyidir. Hətta bu elektromobilin piyadalarla toqquşması daha faciəli ola bilər.
Tesla artıq Gigafactorydə Cybertruck istehsalına start verib. Mütəxəssislər isə elektromobilin yollarda hansı təhlükələr yaratdığını aşkarlayır. Tesla brendinin sözlərinə görə, Cybertruck-un ön və arxa hissəsindəki xüsusi barmaqlıqlar toqquşma zamanı enerjini dağıtmaqla toqquşmanın təsirini azaldır. Habelə Elon iddia edir ki, Cybertruck yüksək təhlükəsizlik səviyyəsinə malikdir və bu baxımdan digər pikap maşınlarından daha uğurludur. Maraqlısı budur ki, Tesla Cybertruck polad gövdəsi və kəskin dizaynına rəğmən tənzimləyici orqanlardan da müvafiq icazələri alıb.
Mütəxəssislərə görə elektromobilin poladdan olması istənilən qəza anında qarşı tərəfə zərərin daha çox dəyməsinə və faciələrin baş verməsinə yol açır. Hətta biz bunu elektromobilin sınaqdan keçirilmiş qəza hallarında da görə bilərik. Kaliforniya Universitetinin Berkeley Təhlükəsiz Nəqliyyat Araşdırma Mərkəzinin direktoru da elektrikli pikapın çəkisi və yüksək sürətlənməsi ilə bağlı öz narahatlığını ifadə edib. Habelə Avropa Nəqliyyat Təhlükəsizliyi Şurası isə Teslanın Avropada Cybertruck-u istifadəyə verməyəcəyinə ümid edərək bəyanat yayıb. Avropa Nəqliyyat Təhlükəsizliyi Şurası-na görə “Bu ölçüdə, gücdə və əhəmiyyətli çəkidə olan bir avtomobil toqquşma zamanı piyadalar və velosipedçilər üçün əhəmiyyətli risk yaradacaq.”
