Cənubi koreyalı texnologiya nəhəngi yeniliklər etməyə davam edir. Belə ki, Samsung bu dəfə Galaxy Z Fold və Flip 7 seriyalarında PHOLED displeylərdən istifadə etməyə hazırlaşır. Yəni Samsung Display şirkətinin bütün mobil ekran panelləri gələcəkdə tamamilə fosfor əsaslı ola bilər. Hətta analitiklər bu ekran panellərinin 2025-ci ilin ikinci yarısında flaqman Samsung cihazlarında istifadə olunacağını da düşünür. Qeyd edək ki, POLED yəni plastik oled və PHOLED fosforlu üzvi işıq yayan diodları fərqlənir. Bəzən insanlar bu ekran panellərini ad oxşarlığına görə qarışdıra bilir.
Qeyd edək ki, hazırda Samsung cihazlarında istifadə olunan AMOLED ekran panellərinin yaşıl və qırmızı pikselləri üçün də bu fosfor əsaslı materiallardan istifadə olunur. Lakin indi Samsung şirkəti ekran panellərində PHOLED texnologiyasından istifadə edərək rəqiblərini qabaqlamaq istəyir. UBI Research mənbəsinə görə yaşıl və qırmızı piksellər üçün PHOLED-dən istifadə edən Samsung, mavi piksellər üçün də araşdırmalarına davam edir. Təbii ki, qatlana bilən smartfonların mavi PHOLED-dən ilk istifadə edib-etməyəcəyi hələlik bəlli deyil, lakin nəzəri olaraq Galaxy Z Fold 7 və Galaxy Z Flip 7 kimi telefonlar bu texnologiyadan ilk yararlanan cihazlar ola bilər. Bununla belə, Samsungun flaqman cihazlar üçün PHOLED-dən istifadə etməsinə mane ola biləcək bəzi davamlılıq problemləri var.
Ümumiyyətlə PHOLED hansı faydalara malikdir? İlk öncə qeyd edək ki, Samsung Display-in AMOLED üçün hazırkı mavi flüoresan həlli 25% daxili işıq səmərəliliyinə, şirkətin qırmızı və yaşıl PHOLED-lərinin isə 100% səmərəliliyinə malikdir. Yəni PHOLED texnologiyasına keçid cihazların ümumi enerji istehlakını ciddi dərəcəd azalda bilər. Lakin bu texnologiya hazırda istifadə olunan ekran panellərindən 55% daha az istifadə ömrünə sahibdir. Məhz bu da şirkətin qarşısında duran əsas məsələdir.
