Ötən gecə fərqli ölkələrdə yaşayan insanlar həyatlarında ilk dəfə qütb parıltısının şahidi olaraq geomaqnit qasırğası müşahidə ediblər. Qeyd edək ki, ABŞ-dan Türkiyəyə qədər bir çox ölkədə ötən gün qeyri-adi hadisə meydana gəlib. Belə ki, Günəşdə meydana gələn Coronal Mass Ejections kimi tanınan geomaqnit qasırğası yerə çatdıqda atmosferin yuxarı hissələrində Aurora olaraq bilinən işıqların meydana gəlməsinə səbəb olub. Ümumiyyətlə Qütb parıltısı və ya Aurora Borealis də bilinir. Maraqlısı budur ki, ötən gecə qütb parıltısı eyni zamanda birdən çox ölkədə müşahidə olunub.
Türkiyə, ABŞ, Kanada, İngiltərə, İtaliya, Rusiya, Macarıstan, Ukrayna və Norveç kimi fərqli ərazilərdə yerləşən ölkələrdə geomaqnit qasırğası nəticəsində əmələ gələn qütb parıltıları müşahidə edilib. Avropa Kosmik Agentliyi (ESA) geomaqnit qasırğasının gücünü G3 səviyyəsində qeydə alıb ki, 5 səviyyəli dərəcə üzrə qasırğanın gücü olduqca yüksək idi. Əslində bu barədə alimlər ötən həftə xəbərdarlıq etmişdilər. Lakin şimal yarımkürəsində dəqiq olaraq hansı ölkələrdə bu təbiət hadisəsinin baş verəcəyi bəlli deyildi.
Qeyd edək ki, Aurora Borealis termini 1619-cu ildə italyan fiziki və astronomu Qalileo Qaliley tərəfindən Roma mifologiyasında şəfəq ilahəsi Aurora və külək tanrısı Boreyadan ilhamlanaraq istifadə edilmişdir. Qütb işıqlarına aid ilk sübutlar ilə 30 min il əvvəl Fransada bir mağaranın divarlarında tapılıb. Onu da qeyd edək ki, yaxın 4-5 il ərzində daha çox oxşar hadisələrin baş verəcəyi gözlənilir və mütəxəssislər daha güclü ssenarilərdə texnoloji avadanlıqların da problem yaşaya biləcəyini bildirirlər.
