Dünyanın ən böyük elektronika istehsalçılarından biri olan Foxconn və texnologiya nəhəngi Nvidia sürücüsüz avtomobillərin inkişafını sürətləndirmək üçün “süni intellekt fabrikləri” yaradacaq. Belə ki, bu süni intellekt zavodu tərəfdaşlığı Nvidia və Foxconn arasında avtonom avtomobil platformalarının inkişafı üçün yanvar ayında elan edilmiş əməkdaşlığa əsaslanır. Müqavilə Foxconn şirkətinin avtomobil istehsalçıları üçün elekton idarəetmə bloklarının əsas təchizatçısına çevrilməsini və Nvidia şirkətinin də Drive Orin adlı superkompüter süni intellekt platforması ilə həmin qurğuların istehsalını nəzərdə tuturdu.
Qeyd edək ki, bu ortaqlığın bir hissəsi olaraq da, Foxconn şirkəti istehsalçısı olduğu avtomobillərin Nvidia-nın Drive Hyperion 9 platforması ilə istehsal ediləcəyini və bu platformanın təkcə Drive Thor deyil, həm də kameralar, radar, lidar kimi bir sıra sensorları ehtiva edəcəyini bildirib. Hətta Foxconn və Nvidia ilə birgə yaradılacaq sistem əslində Teslanın Dojo superkompüterinə rəqib olacaq. Sürücüsüz avtomobillər üçün qurulan bu ortaqlıq çərçivəsində yaradılacaq süni intellekt fabrikləri gələcəkdə Tesla-nı avtomobil sahəsində geri plana da sala bilər.
Qeyd edək ki, Tesla şirkətinin Dojo superkompüteri tam avtonom sürüş yəni FSD funksiyasının, o cümlədən sürücüyə yardım sisteminin əsasını təşkil edir. Bundan əlavə qurulan yeni süni intellekt fabrikləri Nvidia-nın GH200 Grace Hopper Superchip və AI Enterprise proqram təminatına əsaslanacaq. Bununla da deyə bilərik ki, Nvidia və Foxconn süni intellekt əsaslı avtomobillər üçün tarixi addım atır.
