Sony brendinin smartfon strategiyası həqiqətən çox qəribədir. Çünki brendin nə hədəflədiyini və hansı yeniliklər edəcəyini əvvəlcədən bilmək demək olar ki mümkün deyil. Sony uzunmüddətdir ki, smartfon bazarında uğurlu işlərə imza atsa da, son illərdə rəqiblərindən geridə qalıb. İndi isə Sony əfsanəvi Xperia seriyasına yeni 5 V modelini əlavə edərək məhsul çeşidini genişləndirməyə davam edir. Beləliklə daha böyük ana kamera ilə yeni Xperia modeli artıq rəsmi olaraq təqdim edilib. Gəlin görək yeni model bizə nələr vəd edir?
İlk olaraq onu qeyd edək ki, Sony brendinin yeni Xperia 5 V modeli öz dizayn xəttinə sadiq qalıb. Həmçinin yeni smartfon 6.1 düymlük FHD+ təsvir ölçülü 120Hz yenilənmə tezliyinə sahib OLED ekrana sahib olub. Ekran sələfindən daha uzun olsa da, smartfonun kompakt ölçüləri qorunub saxlanılıb. Bundan əlavə yeni model sələfindən 11 qram daha ağırdır və bir qədər qalındır. Yeni flaqman Xperia modeli öz gücünü Snapdragon 8 Gen 2 çipsetindən allır. Kamera tərəfində isə vəziyyət biraz fərqlidir. Belə ki, smartfon iki arxa kamera ilə təchiz edilib. Xperia 5 V modeli 1 V ilə eyni olan 52MP 1/1.35 düymlük əsas sensora və 12MP 1/2.5 düymlük ultra-genişbucaqlı kamera sensoruna sahib olub.
Bundan əlavə yeni smartfon Android 13 əməliyyat sisteminə sahib olub. 5G bağlantısı, USB-C girişi və güc düyməsinə quraşdırılan barmaq izi sensoru smartfonun xüsusiyyətləri arasındadır. Batareya tərəfində isə bizi 5000 mAs batareya qarşılayır. Həmçinin smartfon 30 Vt sürətli şarjı dəstəkləyir və 3.5 mm jack girişinə sahibdir. Hələlik smartfonun rəng seçimləri və hansı regionlarda satışa çıxacağı barədə məlumat yayılmayıb. Lakin smartfonun gələn aydan 849 avro başlanğıc qiyməti ilə təklif ediləcəyi məlumdur.
