Facebook sosial şəbəkəsinin ən çox istifadə olunduğu dövrlərdə populyar olan Messenger Lite mesajlaşma tətbiqi artıq tarixə qovuşur. Qeyd edək ki, aşağı səviyyəli Android cihazlar üçün nəzərdə tutulan tətbiq artıq Meta tərəfindən bağlanılacaq. Hətta tətbiqin bağlanılacağı tarix də məlum olub. Beləliklə 18 Sentyabrdan sonra Messenger Lite tətbiqi tarixin tozlu səhifələrində qalacaq. Xatırladaq ki, Facebook, WhatsApp və Instagram kimi platformaları özündə birləşdirən Meta ilk dəfə 2016-cı ildə Messenger lite adlı tətbiqi hazırlamışdı və istifadəçilərə təqdim etmişdi.
Tətbiqin əsas xüsusiyyəti daha az yaddaş və daha az emal gücünə sahib olması idi. Belə ki, bu tətbiq əsasən aşağı səviyyəli android cihazlarda istifadə olunurdu. İndi isə bu tətbiqə ehtiyac qalmadığı və artıq unudulduğu üçün Meta onu bağlayır. Beləliklə 18 Sentyabr tarixindən sonra Meta şirkətinin Messenger Lite tətbiqi bağlanır. Ümumiyyətlə bir neçə müddətdir ki, istifadəçilər Messenger Lite tətbiqinə daxil olarkən adi Messenger tətbiqinə yönlədirilirdilər. İndi isə tamamilə Lite versiya ləğv ediləcək.
Maraqlısı budur ki, Messenger Lite tətbiqi artıq Google Play Store-da mövcud deyil. Yəni əvvəldən tətbiqə sahib olan istifadəçilər tətbiqin sonuncu istifadəçiləridir. Əslində bu addım bir çox istifadəçiyə təsir etməyəcək. Çünki hazırda istifadə olunan mobil smartfonlar normal Messenger tətbiqini rahatlıqla aça bilir. Bundan əlavə, Meta Facebook və Instagram üçün yeni süni intellekt çatbotları hazırlayır. Təbii ki, süni intellekt çatbotlarının tətbiqə əlavə edilməsi Messenger proqramına olan tələbatı da azaldacaq.
