Ötən gün Azərbaycan Respublikasının Baş naziri Əli Əsədov Bakıda rəsmi səfərdə olan Qazaxıstan Respublikasının Baş naziri Alixan Smailov ilə görüşüb. Qeyd edək ki, baş nazirlər təkbətək keçirilən görüşdə gündəlik aktual mövzulardan bəhs ediblər. Daha sonra isə hər iki ölkənin nümayəndələri də görüşə qatılıb və yekunda Azərbaycan və Qazaxıstan Orta Dəhlizin rəqəmsallaşdırılması üzrə əməkdaşlıq müqaviləsi imzalanıb. Bundan əlavə baş nazirlər neft-qaz sahəsində əməkdaşlığın müsbət məcrada inkişafını vurğulayıb, Qazaxıstan neftinin cari ildə Azərbaycan vasitəsilə üçüncü ölkələrin bazarlarına təchizatının başlanmasını məmnunluqla qeyd ediblər.
Görüş zamanı Azərbaycan və Qazaxıstan arasındakı diplomatik münasibətlərin qurulmasının 30 illiyindən də bəhs edilib. Bildiyimiz kimi, hər iki ölkənin prezidentləri İlham Əliyev və Kasım-Jomart Tokayevin birgə səyləri ilə Azərbaycan-Qazaxıstan strateji tərəfdaşlığı bu gün bütün istiqamətlər üzrə inkişaf edir və hərtərəfli xarakter daşıyır. Nəhayət görüşün yekununda Azərbaycanın Rəqəmsal İnkişaf və Nəqliyyat Nazirliyi ilə Qazaxıstanın Sənaye və İnfrastrukturun İnkişafı Nazirliyi arasında nəqliyyat sahəsində qarşılıqlı fəaliyyətin genişləndirilməsi və Orta Dəhlizin rəqəmsallaşdırılması üzrə əməkdaşlıq Memorandumu imzalanıb.
Ümumi olaraq isə Orta Dəhliz 2014-cü ildə həm Azərbaycan, həm Gürcüstan, həm də Qazaxıstanın iştirakı ilə yaradılmışdı. Daha sonra isə layihə Ukrayna, Ruminiya, Polşa kimi ölkələrə genişlənib. Bütün dəhliz boyunca vahid tarif yaradılıb. Həmçinin Orta Dəhlizdə vahid pəncərə prinsipi tətbiq olunur. Qeyd edək ki, Orta Dəhlizin rəqəmsallaşdırılması ölkəmizdə sənayə infrastrukturunun inkişafına və Azərbaycan ilə Qazaxıstan arasındakı əməkdaşlıq münasibətlərinin inkişafına səbəb olacaq.
